HEYDƏR ƏLİYEV - 1
Almaniyada kikboksinq üzrə “Heydər Əliyev Kuboku” keçirilib
![](/files/galleryphoto/2023/3/1200x630/1702309684384314934_1200x630.jpg)
![](/files/galleryphoto/2023/3/1200x630/17023096843569651545_1200x630.jpg)
![](/files/galleryphoto/2023/3/1200x630/17023096842152710317_1200x630.jpg)
![](/files/galleryphoto/2023/3/1200x630/17023096842349840211_1200x630.jpg)
Bakı, 11 dekabr, AZƏRTAC
Almaniyanın Berlin şəhərində “Heydər Əliyev İli” çərçivəsində kikboksinq üzrə “Heydər Əliyev Kuboku” keçirilib.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, tədbir Milli Məclisin Gənclər və idman komitəsi, Gənclər və İdman Nazirliyi, Diasporla İş üzrə Dövlət Komitəsi, Dünya Kikboksinq Təşkilatları Assosiasiyası (WAKO) və Azərbaycan Kikboksinq Federasiyasının (AKF) birgə təşkilatçılığı ilə baş tutub.
Milli Məclisin sədr müavini, parlamentin Gənclər və idman komitəsinin sədri Adil Əliyev yarışın açılış mərasimində çıxış edib. Azərbaycan Kikboksinq Federasiyasının fəxri prezidenti Adil Əliyev bildirib ki, bugünkü qüdrətli Azərbaycanın məhz Ulu Öndər Heydər Əliyevin gərgin əməyinin bəhrəsidir. O, Ulu Öndər Heydər Əliyevin bütün sahələrə, xüsusilə də gənclər və idman sahəsinə göstərdiyi yüksək qayğıdan söz açıb, onun gənclərimizin milli-mənəvi dəyərlərə bağlı yetişməsi, idmanda kütləviliyin təmin olunması üçün gördüyü işlərdən danışıb.
Ümummilli Liderin siyasi kursunun Prezident İlham Əliyev tərəfindən bütün sahələrdə uğurla inkişaf etdirilməsindən bəhs edən Milli Məclis sədrinin müavini məhz Müzəffər Ali Baş Komandan İlham Əliyevin rəhbərliyi ilə Azərbaycanın ərazi bütövlüyünün bərpa olunduğunu, suverenliyinin bərqərar edildiyini vurğulayıb. O, gənclərə Azərbaycan həqiqətlərinin dünyaya çatdırılması, dövlətimizin qüdrətlənməsi ilə bağlı tövsiyələrini bildirib.
Sonra Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Dünya Kikboksinq Təşkilatları Assosiasiyasının (“WAKO”) prezidenti Roy Baker Azərbaycanın beynəlxalq yarışları yüksək səviyyədə təşkil etməsi və keçirməsi barədə danışıb, ölkə kikboksçularının mütəmadi olaraq göstərdiyi yüksək nəticələrə diqqət çəkib.
Tədbirdə çıxış edən Azərbaycanın Almaniyadakı səfiri Nəsimi Ağayev, Azərbaycan Kikboksinq Federasiyasının Prezidenti Orxan Əliyev Ulu Öndər Heydər Əliyevin Azərbaycan üçün gördüyü misilsiz işlərdən, ölkəmizdə idmana göstərilən qayğıdan söz açıblar.
Ulu Öndər Heydər Əliyevin 100 illiyinə həsr olunmuş kubokda ölkəmizdən və dünyadan, Almaniyanın müxtəlif şəhər və bölgələrindən olan 1200-dən çox kikboksçu öz qüvvələrini sınayıblar.
Qeyd edək ki, “Heydər Əliyev Kuboku”nda 7 peşəkar döyüş keçirilib. Azərbaycan milli yığma komandasının üzvləri Amin Quliyev (63.5 kq), Ruslan Musayev (69 kq), Qəşəm Məmmədov (75 kq), Anar Məmmədov (60 kq), Rauf Gərayzadə (81 kq) və Elxan Əliyev (75kq) xarici ölkələrin kikboksçuları üzərində parlaq qələbə əldə ediblər. İdmançılarımız “Wako Pro” kəmərləri qazanıblar.
Tədbirdə qurulmuş stendlərdə Azərbaycan mətbəxi və mədəniyyəti barədə qonaqlara məlumat verilib.