AMEA Geologiya İnstitutunda Xocalı soyqırımı qurbanlarının xatirəsi anılmışdır
Bakı, 24 fevral (AZƏRTAC). Azərbaycan Milli Elmlər Akademiyasının (AMEA) Geologiya İnstitutunda Xocalı soyqırımının 20-ci ildönümü ilə əlaqədar tədbir keçirilmişdir.
İnstitutun mətbuat xidmətindən AZƏRTAC-a bildirmişlər ki, tədbirdə bu elm müəssisəsinin Gənc Alimlər Şurasının sədri, geologiya-mineralogiya üzrə fəlsəfə doktoru Orxan Abbasov 1992-ci il fevralın 26-da erməni silahlı qüvvələrinin Xocalıda dinc əhaliyə qarşı törətdikləri dəhşətli cinayətlərdən danışmışdır. O demişdir ki, Xocalı soyqırımını dünyaya tanıtdırmaq üçün gənclərin, xüsusən də yeni nəsil tədqiqatçıların üzərinə böyük vəzifə düşür. Bu vəzifənin öhdəsindən layiqincə gəlmək üçün texnologiyanın müasir imkanlarından istifadə etmək vacibdir.
Xocalı soyqırımı barədə geniş tarixi araşdırma ilə çıxış edən Fuad Əliyev və Rəqsanə Əsgərova qeyd etmişlər ki, alimlərimiz layihə və tədbirlərlə əlaqədar xarici ölkələrə ezam olunarkən Xocalı faciəsi barədə reallıqları dünyaya yaymaq istiqamətində geniş imkan qazanırlar. Bundan lazımınca bəhrələnmək, o cümlədən xaricdə təhsil alan soydaşlarımıza Xocalı soyqırımı barədə elmi əsaslı məlumatları internet vasitəsilə göndərmək gənclərin vəzifəsidir.
Geologiya İnstitutunun şöbə müdiri, geologiya-mineralogiya elmləri doktoru, şair Hikmət Mahmudov Xocalı soyqırımını dünyaya tanıtdırmaqda gəncləri daha fəal olmağa çağırmışdır.
Sonra Xocalıda törədilən dəhşətli faciə ilə bağlı film göstərilmişdir.
Bölmənin digər xəbərləri
