AMEA-nın Rəyasət Heyətində iclas keçirilmişdir
Bakı, 20 noyabr (AZƏRTAC). Noyabrın 20-də Azərbaycan Milli Elmlər Akademiyası (AMEA) Rəyasət Heyətinin növbəti iclası olmuşdur.
AZƏRTAC xəbər verir ki, tədbiri AMEA-nın prezidenti, akademik Akif Əlizadə acaraq iştirakçıları gündəlikdəki məsələlərlə tanış etmiş, ilk olaraq “Radiasion katalitik proseslərdə səthi səviyyələrin enerji daşınma proseslərinə təsiri və nanokatalizatorların perspektivləri” adlı məruzənin əhəmiyyətindən danışmışdır. Bildirmişdir ki, Radiasiya Problemləri İnstitutunda enerji tutumlu kimyəvi prosesləri həyata keçirmək üçün ionlaşdırıcı şüaların enerjisinin istifadəsi istiqamətində böyük elmi və praktiki əhəmiyyət kəsb edən yeni nəticələr alınmışdır.
İnstitutun direktoru, AMEA-nın müxbir üzvü Adil Qəribov sözügedən nəticələr barədə məruzə ilə çıxış etmişdir. Vurğulamışdır ki, son illərdə atom-hidrogen energetikası istiqamətində böyük əhəmiyyət kəsb edən sudan universal enerji daşıyıcısı olan hidrogenin radiasiya-katalitik üsulla alınması proseslərində nano ölçülü katalizatorlar istifadə etdikdə klassik ölçülü katalizatorlara nisbətən reaksiyanın sürəti və hidrogenin energetik çıxımının 10-15 dəfə artması faktı aşkar edilmişdir. Alınmış nəticələr nanotexnologiyalar və nanomaterialların müxtəlif sahələrdə tətbiqinin elmi əsaslarının işlənməsində istifadə oluna bilər. Məruzə bəyənilmiş, nəticənin digər kimyəvi, fiziki və bioloji proseslərdə sınaqdan çıxarılması və bu sahədə nano sistemlərin geniş tətbiqi məqsədi ilə elmi tədqiqat işlərini genişləndirmək qərara alınmışdır.
Müzakirəyə təqdim olunan növbəti məsələ AMEA-nın elmi təşkilat və müəssisələrinin fəaliyyətinin qiymətləndirilməsi haqqında olmuşdur. Milli Məclisin deputatı, Kibernetika İnstitutunun laboratoriya müdiri, AMEA-nın müxbir üzvü, professor Asəf Hacıyev çıxış edərək qeyd etmişdir ki, elmi-tədqiqat qurumlarının əldə etdiyi nailiyyətlər, Azərbaycan elminin dünya elmində rolunu və əhəmiyyətini əks etdirən göstəricilər müvafiq komissiyanın iclasında müzakirə olunmuşdur. Rəyasət Heyəti qərara almışdır ki, qiymətləndirmə istiqamətində işlər davam etdirilsin, elmi tədqiqatların nəticələri barədə impaktfaktorlu jurnallarda məqalələrin çap olunmasına və aparıcı beynəlxalq təşkilatlarla əlaqələrin gücləndirilməsinə xüsusi diqqət yetirilsin.
Sonra AMEA-nın akademik katibi, müxbir üzvü Rasim Əliquliyev 2013-cü ildə AMEA üzrə doktorantura və dissertanturaya qəbul planı haqqında danışmışdır. Qeyd etmişdir ki, Akademiyada doktorantura yolu ilə fəlsəfə doktoru hazırlığı üzrə 205 yer ayrılmışdır. Onlardan 126-sı əyani, 79-u qiyabidir. Elmlər doktoru hazırlığı üzrə isə 72 qiyabi yer nəzərdə tutulur. Büdcə hesabına dissertantura yolu ilə fəlsəfə doktoru hazırlığı üzrə 231 və elmlər doktoru hazırlığı üzrə 115 yer müəyyən olunmuşdur.
Bildirilmişdir ki, müzakirədən sonra noyabrın 25-dək doktoranturaya qəbul haqqında elan dərc olunacaq, dekabr ayının 20-dək sənədlərin qəbulu aparılacaqdır. Dekabrın 25-dən isə qəbul imtahanları başlayacaqdır.
Rəyasət Heyətinin növbəti qərarı ilə AMEA 8 gənc alimin namizədliyini “Gənclər üçün Prezident Mükafatı”na irəli sürəcəkdir. Namizədlər AMEA-nın Riyaziyyat və Mexanika, Fizika, Geologiya, Botanika və Ədəbiyyat institutlarının, həmçinin Azərbaycan Tibb Universitetinin elmi nəticələri ilə fərqlənən gəncləridir.
İclasda Akademiyanın 70 illik yubileyinə hazırlıqla bağlı tədbirlər planı da müzakirə olunmuşdur. Akademik Akif Əlizadə çıxış edərək bildirmişdir ki, 70 illiyin təntənəli qeyd olunması üçün dövlət qarşısında vəsatət qaldırılacaqdır. Elmi kadr hazırlığı üzrə dövlət proqramının qəbul edilməsi, Akademiyanın nəzdində universitet və gənc istedadlar liseyinin yaradılması, innovasiya xarakterli elmi-tədqiqatlar üçün texnoparkın tikintisi, “Alimlər şəhərciyi” şəhərciyinin salınması və digər məsələlər tədbirlər planında öz əksini tapmışdır. Əlavə edilmişdir ki, 2015-ci ilin respublikada “Elm ili” elan olunması və Bakının küçələrindən birinə “Elmlər Akademiyası” adının verilməsi barədə də ölkə rəhbərliyinə müraciət ediləcəkdir.
R.Əliquliyev Azərbaycan alimlərinin I qurultayının keçirilməsi üzrə tədbirlər planından da danışaraq bildirmişdir ki, dəvətli qonaqlarla ölkədə elmin mühüm problemlərinə dair dialoqların aparılması və digər məsələlər nəzərdə tutulur. Həmçinin, qurultayın internet saytının hazırlanması, “Azərbaycan alimləri” adlı bələdçi kitabın nəşr edilməsi, AMEA alimlərinin nailiyyətlərinə həsr olunmuş sərginin keçirilməsi də planlaşdırılır.
Digər qərarla Rəyasət Heyəti Mərkəzi aparatının Hüquqi təminat şöbəsinin hüquq və vəzifələri genişləndirilmişdir. Bütün Akademiya miqyasında Azərbaycan Respublikasının Konstitusiyası, qanunları və digər normativ hüquqi aktların icra olunmasına nəzarət, həmçinin elmi işçilərin, alim və mütəxəssislərin müəlliflik hüquqlarının pozulması faktları ilə bağlı qanuna uyğun araşdırmalar aparmaq bu şöbəyə həvalə olunmuşdur.
Tədbirdə “Aqrar və ekologiya elmləri” jurnalının təsis edilməsi haqqında qərar qəbul edilmişdir. Jurnalın çapında məqsəd aqrar və ekologiya elmlərində aparılan tədqiqatların nəzəri, praktiki və texniki nəticələrinin elmi ictimaiyyətə çatdırılmasıdır. Nəşr Azərbaycan, rus və ingilis dillərində olacaqdır.
İclasda 2013-cü ildə aparılmış elmi tədqiqat işlərinin yekunlarına dair hesabatlar və 2014-cü ildə aparılacaq elmi tədqiqat işləri üzrə planların hazırlanması da müzakirə olunmuşdur. Fizika İnstitutunun direktoru, fizika üzrə elmlər doktoru Nazim Məmmədovun, Geologiya İnstitutunun şöbə müdiri, AMEA-nın müxbir üzvü, professor Arif Quliyevin yubileyləri ilə əlaqədar AMEA-nın Fəxri Fərmanı ilə təltif olunmuşlar.
Tədbir kadr məsələlərinin müzakirəsi ilə tamamlanmışdır.
Bölmənin digər xəbərləri
