AzMİU ilə Məhkəmə Ekspertizası Mərkəzi arasında əməkdaşlıq memorandumu imzalanıb
Bakı, 18 iyun, AZƏRTAC
Azərbaycan Memarlıq və İnşaat Universitetində (AzMİU) Ədliyyə Nazirliyinin Məhkəmə Ekspertizası Mərkəzinin nümayəndə heyəti ilə görüş keçirilib.
AzMİU-dan AZƏRTAC-a bildirilib ki, görüşdə Məhkəmə Ekspertizası Mərkəzinin rəisi Elşən Albəndov, AzMİU-nun rektoru memarlıq doktoru, professor Gülçöhrə Məmmədova və hər iki qurumun nümayəndə heyəti iştirak edib.
Görüşdə AzMİU-nun rektoru professor Gülçöhrə Məmmədova universitetin təhsil, elm və beynəlxalq əməkdaşlıq istiqamətlərində əldə etdiyi nailiyyətlərdən və müasir dövrdə mühəndislik, informasiya texnologiyaları, tikinti, şəhərsalma və təhlükəsizlik sahələrinin məhkəmə ekspertizası ilə inteqrasiyası xüsusi əhəmiyyət daşıdığını diqqətə çatdırıb. Professor bildirib ki, məhkəmə ekspertizası fəaliyyətində yüksəkixtisaslı mühəndis və texniki mütəxəssislərə olan tələbat ildən-ilə artır. Bu baxımdan AzMİU ilə Məhkəmə Ekspertizası Mərkəzi arasında qurulan əməkdaşlıq tələbələrin praktiki biliklərinin artırılmasına, elmi-tədqiqat fəaliyyətinin genişləndirilməsinə və ölkənin ekspert potensialının gücləndirilməsinə mühüm töhfə verəcək. Rektor vurğulayıb ki, universitetdə memarlıq, inşaat mühəndisliyi, materiallar mühəndisliyi, geomatika və geodeziya mühəndisliyi, həyat fəaliyyətinin təhlükəsizliyi mühəndisliyi, informasiya texnologiyaları və digər texniki istiqamətlər üzrə aparılan tədqiqatlar məhkəmə ekspertizası sahəsində yeni yanaşmaların formalaşmasına imkan yaradır.
Daha sonra, Məhkəmə Ekspertizası Mərkəzinin rəisi çıxışında Prezident İlham Əliyevin 2025-ci il 11 dekabr tarixli Sərəncamı ilə təsdiq edilmiş “Azərbaycan Respublikasında məhkəmə ekspertizası sahəsinin inkişafına dair 2026–2030-cu illər üçün Konsepsiya”nın qarşıya mühüm vəzifələr qoyduğunu bildirib. O qeyd edib ki, bu vəzifələrin uğurla icrası üçün ali təhsil müəssisələri ilə əməkdaşlığın genişləndirilməsi xüsusi əhəmiyyət kəsb edir.
Elşən Albəndov çıxışında məhkəmə ekspertizası fəaliyyətinin inkişafı yalnız hüquqi biliklərlə deyil, eyni zamanda tikinti, materialşünaslıq, informasiya texnologiyaları, təhlükəsizlik mühəndisliyi və digər texniki sahələr üzrə yüksək ixtisaslı mütəxəssislərin hazırlanması ilə sıx bağlı olduğunu qeyd edib. Onun sözlərinə görə, AzMİU ilə qurulan əməkdaşlıq gələcək ekspertlərin hazırlanmasına, innovativ tədqiqatların aparılmasına və ekspertiza fəaliyyətinin elmi əsaslarının möhkəmləndirilməsinə xidmət edəcək.
Görüş zamanı tərəflər arasında əməkdaşlığın perspektiv istiqamətləri müzakirə olunub. Müzakirələr çərçivəsində tələbələrin Məhkəmə Ekspertizası Mərkəzində istehsalat təcrübələrinin təşkili, birgə elmi konfransların, seminarların və dəyirmi masaların keçirilməsi, məhkəmə ekspertizası sahəsində aktual problemlərin araşdırılması, elmi-metodiki vəsaitlərin hazırlanması, ekspertlərin ixtisasartırma proqramlarının təşkili, eləcə də texnologiya və texniki elmlərlə məhkəmə ekspertizasının inteqrasiyasına yönəlmiş layihələrin xüsusi təlim proqramlarının hazırlanması istiqamətində fikir mübadiləsi aparıblar.
Daha sonra Azərbaycan Memarlıq və İnşaat Universiteti ilə Ədliyyə Nazirliyinin Məhkəmə Ekspertizası Mərkəzi arasında əməkdaşlıq memorandumu imzalanıb.
Memorandum tələbələrin təcrübə proqramlarının təşkili, birgə elmi-tədqiqat layihələrinin həyata keçirilməsi, elmi nəşrlərin hazırlanması, məhkəmə ekspertizasına dair seçmə fənlərin tədris proqramlarına daxil edilməsi, ekspertlərin peşəkar hazırlığının gücləndirilməsi, hüquqi maarifləndirmə tədbirlərinin keçirilməsi və digər istiqamətlərdə uzunmüddətli əməkdaşlığı nəzərdə tutur. Sənəd məhkəmə ekspertizası sahəsində insan kapitalının inkişafına, elmi potensialın gücləndirilməsinə və innovativ həllərin tətbiqinə xidmət edəcək.
İmzalanan memorandum AzMİU ilə Məhkəmə Ekspertizası Mərkəzi arasında strateji tərəfdaşlığın yeni mərhələsini formalaşdırmaqla yanaşı, ölkədə məhkəmə ekspertizası sahəsinin inkişafına, müasir çağırışlara cavab verən peşəkar kadrların hazırlanmasına və elm-təhsil-istehsalat əməkdaşlığının daha da genişlənməsinə mühüm töhfə verəcək.
Bölmənin digər xəbərləri
