Ekspert: Müəllimlərin tədris prosesinə vahid geyim formasında cəlb olunmasının müsbət təsirləri çoxdur
Bakı, 18 iyun, AZƏRTAC
Orta ümumtəhsil məktəblərində şagirdlərlə yanaşı, müəllimlərin də vahid geyim formasında tədris prosesinə cəlb olunması nəzərdə tutulur. Beynəlxalq təcrübədə tətbiq olunan bu qayda təhsili inkişaf etmiş əksər ölkələrdə, o cümlədən Türkiyədə keçərlidir. Hesab edirəm ki, Azərbaycanda tətbiqi nəzərdə tutulan bu qayda müəllimlərin geyimində nizam-intizam yaradacaq. Qanuna ediləcək dəyişikliklər müəllimlər üçün konkret standartlara uyğun geyim tələblərinin müəyyənləşdirilməsini ehtiva edir.
Bu fikirləri AZƏRTAC-a müsahibəsində ixtisas seçimi və gələcək karyera üzrə mütəxəssis, təhsil eksperti Ramin Nurəliyev deyib. Onun sözlərinə görə, təhsilverənlərin eyni formada tədris prosesinə cəlb olunması müəyyən metodlarla həyata keçirilə bilər: “Müəyyən standartlar qoyulacaq. Misal üçün deyək ki, xanım müəllimlər üçün ətək müəyyən ölçülərdə olacaq, şalvar olmayacaq. Kişi müəllimləri üçün şalvarın forması və s. müəyyən olunacaq. Dünya ölkələrində bu şəkildə standartlar çoxdan tətbiq olunur. Milli Məclisin plenar iclasına tövsiyə olunan qanun layihəsində nəzərdə tutulan məsələlərdən biri də əlbəttə ki, təhsilalanlarla yanaşı təhsilverənlərin vahid geyim formasında olmasıdır. Təhsilalanlar neçə ildir ki, vahid geyim formasında tədris prosesinə cəlb olunurlar. Bununla yanaşı, həm şagirdlərdə, həm valideynlərdə müəyyən narazılıqlar olurdu. Amma bundan sonra düşünürəm ki, artıq müəllimlərin də vahid geyim formasında olması şagirdlərin və valideynlərin narazılığına son qoyacaq. Çünki əgər müəllim məktəbə vahid geyim formasında gəlirsə, hətta burada şagirdin deyəcəyi və yaxud valideynin narazılıq edəcəyi hər hansı məqam olmayacaq”.
Ekspert qeyd edib ki, vahid geyim forması sosial bərabərsizliyin tənzimlənməsinə müəyyən qədər müsbət təsir etməklə yanaşı, həmçinin nizam-intizama töhfə verə bilər: “Məktəbdə müəllimlərin müəyyən bir standart formada olması istər-istəməz həmin təhsil müəssisəsinin nizam-intizama uyğun addım atdığının göstəricisi kimi qiymətləndirilir. Artıq vahid geyim forması sosial bərabərliyi tam təmin etmiş olacaq. Varlı da, kasıb da, imkanlı da, imkansız da eyni formada tədris prosesinə cəlb olunacaq. Düşünürəm ki, bunun hər hansı mənfi təsiri olmayacaq. Əgər müəllim təhsilverəndirsə, tədris prosesinə nizamlanan formada cəlb olunmalıdır”.
Onun sözlərinə görə, özəl təhsil müəssisələrində müəllimlərin müəyyən standartlar çərçivəsində geyinməsi artıq qəbul olunub: “Bu, beynəlxalq təcrübədə də var. Artıq dövlət təhsil müəssisələrində bu şəkildə bir geyim normativinin tətbiqi nəzərdə tutulur. Bunun, əlbəttə ki, müsbət təsirlərini görəcəyik. Yəni məktəbdə bir müəllim aurası, bir təhsilverən aurası formalaşmış olacaq. Çox gözəl bir təşəbbüsdür. Düşünürəm ki, bu baxımdan hətta qanunvericilikdə müəllimin qanunvericiliyin müvafiq tələbinə uyğunlaşması qaydası da müəyyən olunacaq. Məktəb vahid geyim formasından kənara çıxarsa, müəyyən qaydada inzibati formada cəzalandırılması da nəzərdə tutulur. Fikrimcə, müəllimlər artıq verilən qaydalara müəyyən qədər riayət etmiş olacaqlar”, - deyə təhsil eksperti fikrini yekunlaşdırıb.
Bölmənin digər xəbərləri
