Anar Bağırov: Cinayət Məcəlləsinə ekosidlə bağlı yeni maddənin əlavə olunmasını təklif edirik
Bakı, 28 dekabr, AZƏRTAC
Azərbaycan Prezidenti İlham Əliyev tərəfindən vəkilliyə hərtərəfli qayğı göstərilir. Bu diqqət və qayğı nəticəsində ölkəmizdə vəkillik ildən-ilə inkişaf edir. Əsas hədəfimiz vətəndaşlarımıza keyfiyyətli hüquqi yardımın təmin olunmasıdır. Bu məqsədlə vəkillərin peşə hazırlığının daha da artırılması üçün zəruri tədbirlər görülməkdədir. İşğaldan azad edilmiş ərazilərimizdə vəkil büroları açmaq əsas hədəflərimizdən biridir. Bu planı yaxın zamanlarda reallaşdırmaq istəyirik. Eyni zamanda, vəkillik haqqında qanunların təkmilləşməsini arzu edirik. Bunun üçün də tərəfimizdən müəyyən təkliflər hazırlanır və müvafiq qurumlarla müzakirələr davam etdirilir.
AZƏRTAC xəbər verir ki, bunu Azərbaycan Respublikası Vəkillər Kollegiyasının Rəyasət Heyətinin sədri Anar Bağırov dekabrın 28-də jurnalistlərə açıqlamasında deyib.
Azərbaycanın təbii resurslarının Qarabağda separatçılar tərəfindən barbarcasına istismar olunduğunu və bunun ölkə ictimaiyyətini dərindən narahat etdiyini vurğulayan A.Bağırov bildirib: “Vəkillər Kollegiyasının tərkibində fəaliyyət göstərən Cinayət hüququ qrupu tərəfindən müvafiq təkliflər hazırlanır. Təklif edirik ki, Azərbaycan Respublikasının Cinayət Məcəlləsinə ekosidlə bağlı yeni maddə əlavə olunsun. Beynəlxalq hüquqda da belə yanaşma var ki, böyük fəsadlarla nəticələnən bu cür fəaliyyətlərlə bağlı müvafiq maddələr olmalıdır. Ölkəmizin cinayət qanunvericiliyində də belə maddə olarsa, ekologiyamıza ciddi zərər vuran şəxslər barəsində qanunda nəzərdə tutulmuş qaydada tədbirlər görmək mümkündür. Ümid edirəm ki, bu təşəbbüs özünü doğruldacaq”.
Bölmənin digər xəbərləri
