Ankarada Türk Dünyası Marketinq, Reklam və Media Birliyinin təqdimatı olub
Ankara, 15 aprel, AZƏRTAC
Aprelin 15-də Ankaranın Seyitözü səmtində yerləşən Türkiyə Ticarət Nazirliyinin binasında Türk Dünyası Marketinq, Reklam və Media Birliyinin (TÜREK) təqdimat mərasimi keçirilib.
AZƏRTAC xəbər verir ki, Türk dünyasında əməkdaşlığı daha da gücləndirmək məqsədi daşıyan TÜREK-in yaradılması ideyasının təşəbbüskarları Türkiyə və Azərbaycanın reklam strukturları olub.
Tədbirdə Türkiyənin ticarət naziri Ömer Bolat, müxtəlif dövlət və özəl strukturların, reklam sektorunun nümayəndələri iştirak ediblər.
Yeni strukturun yaradılmasına dair sənəd Azərbaycandan “Reklam və Marketinq Sahəsinin İnkişafına Dəstək” İctimai Birliyi (RMİD), Türkiyədən Reklam və Marketinq Əlaqələri Dərnəyi (REPİD) və ARED arasında imzalanıb. Tədbirdə Azərbaycandan Reklam və Marketinq Sahəsinin İnkişafına Dəstək İctimai Birliyinin (RMİD) nümayəndələri iştirak ediblər.
Türkiyənin ticarət naziri Ömer Bolat tədbir iştirakçıları qarşısında çıxış edərək türk dövlətlərinin bazarlarının potensialına diqqət çəkib. O deyib: “Bu gün Türk Dövlətləri Təşkilatının ərazisində 175 milyon insan yaşayır, reklam bazarının həcmi 7 milyard avroya, iqtisadiyyatın ümumi həcmi isə ən azı 1,8 trilyon avroya çatır. Belə mühüm bazara çıxış TÜREK üçün əsas prioritetdir”.
Ömer Bolat qeyd edib ki, Türk dünyası ölkələri arasında mədəni yaxınlıq və strateji əməkdaşlıq potensialı əsasında yeni birliyin yaradılması təklifi gündəliyə daxil edilib. “TÜREK-in yaradılması ilə türk brendləri qlobal səviyyəyə çıxmaq imkanı əldə edəcək. Bütün bunlar son nəticədə birləşən ərazi birliklərinin imkanlarını gücləndirəcək", - deyə Ticarət Nazirliyinin rəhbəri vurğulayıb.
Daha sonra çıxış edən ARED-in sədri Şahin Acar ümidvar olduğunu bildirib ki, digər türk dövlətləri də Türkiyə, Azərbaycan və Şimali Kipr Türk Cümhuriyyətindən nümunə götürəcək.
TÜREK-in sədr müavini vəzifəsinə təyin olunmuş RMİD İdarə Heyətinin sədri Xəyalə Mütəllimova Azərbaycanın reklam sektorunda həyata keçirilən uğurlu layihələrdən danışıb.
O, TÜREK platformasının türk dövlətlərinin iqtisadi və mədəni əlaqələrini gücləndirəcəyinə, iqtisadiyyatın ayrı-ayrı sektorları arasında əlaqələrin qurulmasına şərait yaradacağına, diaspor təşkilatlarının birliyini artıracağına əminliyini ifadə edib.
Yeni strukturun mərkəzi ofisi İstanbulda yerləşəcək. TÜREK türk dövlətlərinin reklam sənayesində sinerji yaratmaq, mal və xidmətlərin rəqabət qabiliyyətini artırmaq məqsədilə çoxsaylı layihələr həyata keçirməyi planlaşdırır.
Quruma sədrlik ilk iki il Türkiyəyə tapşırılacaq, daha sonra Azərbaycana keçəcək.
Təşkilat digər türk dövlətlərinin, eləcə də diaspor strukturlarının iştirakına açıqdır.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
