ARDNŞ İŞÇİLƏRİNƏ MADDİ YARDIM VERƏCƏK
AZƏRTAC xəbər verir ki, Dövlət Neft Şirkəti (ARDNŞ) Azərbaycan Neft və Qaz Sənayesi İşçiləri Həmkarlar İttifaqının Respublika Komitəsi ilə birlikdə ARDNŞ-də çalışan işçilərə maddi yardım verilməsinin qayda və şərtlərini tənzimləmək məqsədilə əmr-qərar imzalamış, “ARDNŞ işçilərinə maddi yardım verilməsi haqqında Əsasnamə”ni təsdiq etmişlər. Azərbaycan Respublikası Əmək Məcəlləsinin və digər qanunvericilik aktlarının tələblərinə uyğun hazırlanmış Əsasnamədə ilk dəfə ailə quran, ailəsində anadangəlmə və ya uşaqlıqdan əlil olan, təbii fəlakət zamanı zərər çəkən, Qarabağ, Böyük Vətən və Əfqanıstan müharibələrində iştirak etmiş işçilərə, o cümlədən Qarabağ müharibəsində və 20 Yanvar hadisələrində həlak olmuş şirkət əməkdaşlarının 18 yaşına çatmamış övladlarının hər birinə, tənha analara və s. maddi yardımların verilməsi nəzərdə tutulur. Bu məqsəd üçün xüsusi fond yaradılmışdır.
