Argentinada aralıq seçkilər Xavyer Mileyə həlledici qələbə qazandırıb
Bakı, 27 oktyabr, AZƏRTAC
Argentina Prezidenti Xavyer Mileyin partiyası qanunvericilik orqanına aralıq seçkilərdə inamlı qələbə qazanıb. Beləliklə, seçicilərin sərt iqtisadi tədbirlərdən geniş narazılığına baxmayaraq, radikal iqtisadi islahatları davam etdirmək üçün ona mandat veriblər.
AZƏRTAC xəbər verir ki, rəsmi nəticələrə görə, Prezidentin “Azadlıq dövrü gəlir” partiyasının rəhbərlik etdiyi blok ölkə üzrə səslərin təxminən 41 faizini, “Vətən gücü” koalisiyasında birləşən müxalifət isə 31,7 faizini toplayıb.
Analitiklər bildiriblər ki, seçkilərdə gözləniləndən yüksək rəqəmlər Mileyin sərt iqtisadi siyasətindən imtina ediləcəyi təqdirdə ölkədə iqtisadi qarışıqlığın yenidən başlaması qorxusunu əks etdirə bilər. Bu siyasət bir çox argentinalıların uzun müddət etibar etdiyi subsidiyaları azaltsa da, inflyasiya tempini əhəmiyyətli dərəcədə yavaşladıb.
“Reuters”in məlumatına görə, Prezident Miley nəticələrin elan edilməsindən sonra keçirilən təntənəli nitqində bildirib: “Argentinalılar uğursuzluq modelinə qayıtmaq istəmədiklərini göstərdilər”.
ABŞ Prezidenti Donald Tramp Mileyi dəstəkləmək üçün təxminən 40 milyard dollarlıq maliyyə yardımı təklif edib.
Bir çox analitik, həmçinin pesonun devalvasiyasını proqnozlaşdırıb və onların fikrincə, milli valyutanın kursu inflyasiyanı cilovlamaq üçün həddindən artıq qiymətləndirilib.
Bölmənin digər xəbərləri
