Asiya İnfrastruktur İnvestisiya Bankı Banqladeşə 200 milyon dollar kredit ayırıb
Pekin, 5 mart, AZƏRTAC
Azərbaycanın da təsisçi-üzv olduğu Asiya İnfrastruktur İnvestisiya Bankı (AİİB) Banqladeşə 200 milyon ABŞ dolları kredit ayırıb.
Bankın Pekindəki mənzil-qərargahından AZƏRTAC-a bildirilib ki, vəsait paytaxt Dəkkədə və ölkənin qərb hissəsində elektrik təchizatı sisteminin yaxşılaşadırılması layihəsinə yönəldiləcək. Bildirilir ki, hökumət sürətlə sənayeləşmə və urbanizasiya ilə nəticəsində elektrik enerjisinə artan tələbatı ödəmək üçün bir sıra layihələr həyata keçirir. Buna baxmayarq, hələ də əhalinin təxminən 22 faizi elektrik enerjisindən korluq çəkir. Elektrik təchizatının zəif olması hər il Banqladeşin ümumi daxili məhsulunun (ÜDM) təxminən 2-3 faizinin itkiyə getməsinə səbəb olur.
Bu, AİİB-in Banqladeşə verdiyi ilk kredit deyil. Bank 2016-cı ilin iyununda Banqladeşdə elektrik təchizatı sisteminin yenidən qurulması layihəsinə 165 milyon dollar ayırmışdı.
Qeyd edək ki, 2016-cı ilin yanvarında Azərbaycan da daxil olmaqla 57 təsisçi-üzv ölkə tərəfindən yaradılan bank 100 milyard ABŞ dolları nizamnamə kapitalı ilə Asiyada enerji, nəqliyyat, şəhərsalma, su təchizatı, logistika, telekommunikasiya, kənd təsərrüfatı, ətraf mühit və digər sahələr üzrə infrastruktur layihələri maliyyələşdirir. Bank fəaliyyətə başladığı vaxtdan indiyədək Azərbaycan da daxil olmaqla, 65 layihəyə, ümumilikdə, 12,44 milyard dollar kredit ayırıb. AİİB 2016-cı ilin dekabrında TANAP layihəsinə 600 milyon dollar kredit verib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
