ASİYA ÖLKƏLƏRİ VAHİD VALYUTA TƏTBİQ ETMƏYƏ HAZIRLAŞIR

24.10.2005 [21:54]
Çap et
A⁺ A^-

AZƏRTAC xarici KİV-lərə istinadla xəbər verir ki, Asiya İnkişaf Bankı 2006-cı ildən etibarən avro kimi vahid Asiya valyutasının yaradılmasına başlayacaqdır. Güman edilir ki, layihədə 13 ölkə - Yaponiya, Çin, Cənubi Koreya, Cənub Şərqi Asiya Ölkələri Assosiasiyasının (ASEAN) üzvü olan 10 dövlət iştirak edəcəkdir. Təşkilatçılar perspektivdə onlara Honkonq və Tayvanın da qoşulacağını istisna etmirlər.

İlkin mərhələdə ötən əsrin 70-ci illərində tətbiq edilmiş Avropa “ekü”sünə (ECU) bənzər “akü”nün (ACU) vahid valyuta kimi yaradılması nəzərdə tutulur. “Akü” bir növ ASEAN ölkələrinin ümumi milli məhsulunu və xarici ticarətin həcmini mütənasib şəkildə əks etdirən “valyuta səbəti” olacaqdır. Asiya İnkişaf Bankı hər gün Asiyanın bütün ölkələrinin valyutalarının ”akü”yə nisbətdə məzənnələrini açıqlayacaqdır. Milli valyutaları “akü”yə bağlamaq üsullarını hazırlamaq və valyuta fərqini aradan qaldırmaq üçün ümumi iqtisadi siyasət aparmağı Assosiasiyaya daxil olan ölkələrə həvalə etmək nəzərdə tutulur.

Bu ideya Şərqi Asiya dövlətləri başçılarının dekabrda Malayziyada keçiriləcək zirvə görüşündə müzakirə olunacaqdır.

Asiya İnkişaf Bankının iqamətgahı Filippinin paytaxtı Manilada yerləşir. Hazırda ona yaponiyalı Xaruxiko Kuroda başçılıq edir.