Bakı, 14 avqust, AZƏRTAC

“Qarabağ”ın səfərdə evdəkindən daha yaxşı oynayacağını onsuz da təxmin edirdim. Qələbə açıq-aşkar görünürdü”.

Bu sözləri AZƏRTAC-a açıqlamasında veteran futbolçu Aslan Kərimov “Qarabağ”ın UEFA Çempionlar Liqasının III təsnifat mərhələsində Bolqarıstanda “Ludoqorets”ə 7:2 hesabı ilə qalib gəldiyi cavab oyunu ilə bağlı danışarkən deyib.

52 yaşlı mütəxəssis rəqibin müdafiə xəttində kifayət qədər problemlərin olduğunu bildirib: “Bu, oyun başlar-başlamaz gözə çarpırdı. Müdafiəçilərin kobud səhvindən istifadə edib qolumuzu vurduq. Rəqibin heyətində “Qarabağ”ın müdafiəçilərini asanlıqla keçə bilən Bernard Tekpetey adlı bir hücumçu var. Bakıda keçirilmiş ilk matçda Kevin Medina ilə qarşı-qarşıya gələn zaman ayağı sındı. Bu futbolçunun cavab görüşündə komandasına kömək edə bilməməsi xeyrimizə oldu. Bundan başqa, bizə başla qol vuran oyunçuları qırmızı vərəqə ilə cəzalandırıldı. Bununla da dünənki matçda oynamaq şansını itirdi. “Ludoqorets”in Bakıda daha güclü heyətlə çıxış etməsinə baxmayaraq, biz daha dominant oyun nümayiş etdirə bilirdik. Həmçinin çoxlu qol imkanları yaradırdıq. Təəssüf ki, bunu qola çevirə bilmirdik. Fikrimcə, rəqibin iki aparıcı oyunçusu meydanda olsaydı belə, qələbə yenə bizim olacaqdı. Həmçinin ilk hissənin sonlarında Marko Yankoviçin Patrik Andrade ilə əvəzlənməsi lehimizə işlədi. O, meydana daxil olduqdan sonra mərkəzdə daha etibarlı müdafiə xətti gördük”.

A.Kərimov oyun zamanı onu ən çox təəccübləndirən məqamı da qeyd edib: “Məni ən çox təəccübləndirən ilk hissədə buraxılan iki qol oldu. Düşünmürdüm ki, belə asan qollar buraxa bilərik. Bunu heç təxmin belə etmirdim. Komandanın ümumi oyununu dəyərləndirsək, qapıçımız Fabiyan Buntiçin çıxışının çox da ürəkaçan olmadığını deyə bilərik. Digər üzücü məqam isə futbolçularımızın zədələnməsi oldu. Bu amil növbəti oyuna öz təsirini göstərəcək. Hətta sağalsalar belə, müəyyən müddət meydanlardan uzaq qalmalı olacaqlar. Ən azı 2-3 gün məşq etməməlidirlər. Bu isə hazırlıq planına yaxşı təsir etməyəcək”.

Qeyd edək ki, “Qarabağ” III təsnifat mərhələsində “Ludoqorets” klubunu iki oyunun nəticəsinə əsasən 8:4 hesabı ilə məğlub edərək pley-offa vəsiqə qazanıb. “Köhlən atlar” bu raundda Xorvatiyanın "Dinamo" (Zaqreb) klubu ilə qarşılaşacaq. Ağdam klubu ilk matçını avqustun 20-də səfərdə, cavab görüşünü isə ayın 28-də Bakıda keçirəcək. Zaqrebdəki görüş Bakı vaxtı ilə saat 23:00-da, evdəki oyun isə saat 20:45-də başlayacaq.