SİYASƏT
AŞPA-nın anti-Azərbaycan qərarı bumeranq effekti verə bilər ŞƏRH
![AŞPA-nın anti-Azərbaycan qərarı bumeranq effekti verə bilər ŞƏRH](/files/2024/1/1200x630/17059872121177846903_1200x630.jpg)
Bakı, 23 yanvar, AZƏRTAC
Avropa Şurası Parlament Assambleyasının (AŞPA) ötən gün başlayan qış sessiyasının ilk iclasında Azərbaycan nümayəndə heyətinin etimadnaməsinin təsdiqlənməməsi bu qurumun bəzi dövlətlərin siyasi aləti olduğunu bir daha ortaya qoydu. Almaniyalı deputat Frank Şvabenin Azərbaycan nümayəndə heyətinin etimadnaməsinin təsdiqlənməməsi ilə bağlı təklifinin dəstəklənməsi AŞPA-nın imicinə ciddi ləkədir və onun ədalətinə şübhə salır.
Bu fikirləri AZƏRTAC-a açıqlamasında politoloq Ramiz Alıyev AŞPA-nın Azərbaycanla bağlı qəbul etdiyi qərarı şərh edərkən bildirib.
Onun sözlərinə görə, AŞPA-nın qərarı Azərbaycanla Ermənistan arasında sülhün əldə olunmasına xidmət etmir: “Cənubi Qafqazda yerləşən bu iki ölkə son illər düşmənçiliyi bir kənara qoyaraq sülh prosesinin müzakirəsini sürətləndiriblər. Tərəflər sülh niyyətlərini açıqlayıblar. Belə bir məqamda AŞPA-nın sülh prosesinə dəstək verməsi əvəzinə, birtərəfli qaydada Azərbaycana sanksiyalar tətbiq etməsi təəssüf doğurur. Avropalı deputatların 2023-cü ildə Ermənistandan Laçın dəhlizi vasitəsilə Qarabağa səfər etməsinə icazə verilməməsi məntiqli idi. Azərbaycan tərəfi haqlı olaraq təklif etmişdi ki, Qarabağa səfər yalnız ölkə ərazisindən mümkündür. Amma AŞPA deputatları süni şəkildə gərginlik yaratmaq üçün beynəlxalq hüququ pozmaq yolunu seçdilər. AŞPA-da Azərbaycanla bağlı qəbul edilən qərar heç bir halda insan hüquqları ilə bağlı deyil, siyasi məsələdir. Baş verənlər öz suverenliyini və ərazi bütövlüyünü bərpa etmiş Azərbaycana qarşı qisas cəhdidir. Azərbaycan 30 il ərzində ən müxtəlif platformalarda, o cümlədən AŞPA-da Ermənistanın işğalçılıq siyasətinə qiymət verilməsi üçün təkliflər verib. Amma hər dəfə “münaqişənin həlli ilə ATƏT-in Minsk qrupu məşğul olur” cavabı ilə Ermənistanı sanksiyalardan qoruyublar, işğalçını müdafiə ediblər. Azərbaycan ərazi bütövlüyünü və suverenliyini təkbaşına təmin etdi. Bu isə Avropa Şurasının (AŞ) və AŞPA-nın “maraqlar”ına uyğun olmadı. İndi onlar ölkəmizi cəzalandırmaq qərarına gəliblər. Amma unutmasınlar ki, AŞPA-nın nə qərarı, nə də özü Azərbaycan üçün heç bir əhəmiyyət kəsb etmir. Avropa Şurası Azərbaycanın ümidlərini heç vaxt doğrultmayıb. AŞPA-da Azərbaycanın ərazi bütövlüyünü dəstəkləyən, Ermənistanı işğal olunmuş əraziləri boşaltmağa çağıran bir neçə qətnamə qəbul olunsa da, onlar kağız parçası olaraq qaldı və heç bir real addım atılmadı. Sual olunur, nə üçün 30 il ərzində AŞPA Ermənistana qarşı heç bir sanksiya tətbiq etmədi? Öz gücünə Qarabağı azad edən Azərbaycan üçün AŞPA-nın qərarı kağız parçasından başqa bir şey deyil”.
R.Alıyev qeyd edib ki, Azərbaycan nümayəndə heyəti də öz növbəsində AŞPA-da qalıb-qalmamaqla bağlı qərar verməli, Azərbaycanın İnsan Haqları üzrə Avropa Məhkəməsinin yurisdiksiyasından çıxmasını da müzakirə etməlidir: “Çünki 2001-ci ildə üzvü olduğu təşkilat Azərbaycana heç nə verməyib. Xristian klubu kimi fəaliyyət göstərən Avropa İttifaqı, Avropa Parlamenti, AŞ və AŞPA böyük həvəslə Azərbaycana və Türkiyəyə qarşı məsələləri müzakirə edib. İslamofob və türkofob təfəkkürlü həvəskar siyasətçilərin düşərgəsinə çevrilən AŞPA həm də korrupsiya yuvasına çevrilib və sanki diaspor təşkilatı kimi fəaliyyət göstərir. Qarşıdan Avropa Parlamentinə seçkilər gəlir. Erməni diasporundan maliyyə dəstəyi almaq istəyən avropalı deputatların Azərbaycana qarşı fəallaşması təsadüfi deyil. Eyni zamanda, Fransa və Almaniyanın əlində siyasi alətə çevrilən AŞPA sifarişləri Paris və Berlindən alır. Almaniyalı deputat Frank Şvabenin bu çirkin kampaniyada yer alması təəssüf doğurur. AŞPA-dakı müzakirələrdə mənim diqqətimi çəkən britaniyalı deputat İan Liddel-Grangerin Azərbaycanın səsvermə hüququnun məhdudlaşdırılmasına qarşı çıxması oldu. O, haqlı olaraq bildirdi ki, bu, səhv qərardır. Heç bir müsbət nəticə verməyəcək. Doğrudan da AŞPA-nın anti-Azərbaycan fəaliyyəti bumeranq effekti verəcək. Strasburq Bakının verəcəyi cavaba hazır olmalıdır. Verəcəyimiz cavab nüfuzu öləziyən bir Avropa təşkilatının məhvi prosesini daha da sürətləndirəcək”.