ATƏT AZƏRBAYCANDA QADIN SAHİBKARLIĞININ İNKİŞAFINA KÖMƏK EDİR

30.07.2003 [04:21]
Çap et
A⁺ A^-

Müstəqil Hüquq Mərkəzi ATƏT-in Bakı ofisi ilə “Qadın sahibkarların təlimi” layihəsi üzrə əməkdaşlıq etməyə başlamışdır. Mərkəzin prezidenti Aydın Kərimov AZƏRTAC-ın müxbiri ilə söhbətində bildirmişdir ki, bu gün sahibkarlıq sahəsində qəbul olunmuş hüquqi-normativ aktların əhali, xüsusilə regionlarda yaşayan qadınlar tərəfindən öyrənilməsi sahibkarlığın inkişafı sahəsində dövlətimizin siyasətinin uğurla aparılmasına kömək edəcəkdir. Xüsusilə son dövrlərdə Azərbaycan Prezidentinin sahibkarlığın inkişafına göstərdiyi qayğı nəticəsində regionlarda bu sahəyə maraq xeyli artmışdır. Bu səbəbdən layihə yeni başlasa da, bizə çoxlu müraciət gəlməkdədir.

Layihə çərçivəsində Azərbaycanın on rayonunda - Şəki, Balakən, Masallı, Şəmkir, Mingəçevir, Əli Bayramlı, Qəbələ, Quba, İsmayıllı və Sabirabadda sahibkar və sahibkarlıqla məşğul olmaq istəyən qadınlar üçün sahibkarlıq fəaliyyətinin hüquqi əsaslarına, hüquqi şəxslərin yaradılması və qeydiyyatına, mühasibat uçotunun aparılmasına və vergi ödəmələrinə dair ikigünlük təlim kurslarının keçirilməsi nəzərdə tutulmuşdur.

Kursların iştirakçıları əvvəlcədən paylanmış sorğu vərəqələri əsasında seçiləcəklər. Dinləyicilərə sertifikatlar təqdim olunacaqdır.

ATƏT AZƏRBAYCANDA QADIN SAHİBKARLIĞININ İNKİŞAFINA KÖMƏK EDİR

MÜƏLLİFLƏ ƏLAQƏ

Bölmənin digər xəbərləri