ATƏT sədri: Tərəflər Dnestryanı problemin sülh yolu ilə həllində maraqlıdırlar
Kişineu, 13 aprel, AZƏRTAC
ATƏT Moldova daxilində Dnestryanı üçün xüsusi statusa malik beynəlxalq səviyyədə tanınmış sərhədləri daxilində Moldova Respublikasının suverenliyi, ərazi bütövlüyü əsasında bu münaqişənin sülh yolu ilə, hərtərəfli və davamlı həllinə çalışacaq.
AZƏRTAC xəbər verir ki, bu barədə Moldovaya ilk səfərinin yekunlarına dair bəyanatında ATƏT-in fəaliyyətdə olan sədri, Maltanın xarici və Avropa işləri naziri Yan Borq söyləyib.
Yan Borq bildirib ki, o, Dnestryanı nizamlama prosesinin irəliləməsinə və təşkilatın yerlərdə fəaliyyətinin gücləndirilməsinə xüsusi diqqət yetirərək, ATƏT-in Moldovada fəaliyyətini fəal şəkildə davam etdirəcək.
Kişineuda ATƏT-in fəaliyyətdə olan sədrinin Moldova Prezidenti Maya Sandu, Baş nazir Dorin Reçan, həmçinin Baş nazirin müavini və xarici işlər naziri Mixail Popsoy, Dnestryanı bölgənin lideri Vadim Krasnoselski və danışıqların Tiraspoldan olan nümayəndəsi Vitali İqnatyevlə görüş zamanı Dnestryanı nizamlama prosesi müzakirə olunub. Bu prosesin irəliyə aparılması üçün konstruktiv dialoqun inkişaf etdirilməsində və etimadın dərinləşdirilməsində Təşkilatın rolu vurğulanıb.
"Biz hər iki tərəfin bütün açıq məsələləri, eləcə də münaqişənin özünü yalnız sülh yolu ilə həll etmək öhdəliyini davamlı olaraq təsdiqləmələrini yüksək qiymətləndiririk", - deyə Yan Borq əlavə edib.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
