ATGTİ sədri: Bugünkü forum gənclərin beynəlxalq səviyyədə uğur qazanmasına töhfə verəcək
Bakı, 24 yanvar, AZƏRTAC
Bu gün Bakı şəhərində “Youth Quantum Forum 2025” adlı tədbir keçirilib. Forumda kvant fizikası və onun müasir elmdə tətbiq sahələri əsas müzakirə mövzusudur. Elm və təhsil sahəsində Azərbaycan gənclərinin xaricdə də uğur qazanması üçün belə tədbirlər böyük əhəmiyyət daşıyır.
AZƏRTAC xəbər verir ki, bu sözləri Azərbaycan Tələbə Gənclər Təşkilatları İttifaqının sədri Rəşad Zeynalov jurnalistlərə açıqlamasında söyləyib. O qeyd edib ki, forum gənclərin elm və təhsilə marağını artırmaq, onların beynəlxalq səviyyədə uğur qazanmasını dəstəkləmək məqsədi daşıyır: “Bizim əsas məqsədimiz bu cür platformalar vasitəsilə gənclərin elmi biliklərini inkişaf etdirmək və gələcəkdə onların daha böyük uğurlara imza atmasına şərait yaratmaqdır”.
Onun sözlərinə görə, əgər bu forum arzu olunan nəticələri verərsə, gələcəkdə belə tədbirlərin mütəmadi şəkildə təşkil olunması planlaşdırılır: “Bu gün keçirilən forum kvant fizikası kimi strateji və yenilikçi sahədə gənclərin bilik və bacarıqlarını artırmağa töhfə verəcək. Forum çərçivəsində, həmçinin ekspertlər tərəfindən kvant texnologiyalarının qlobal trendləri və onların Azərbaycanda tətbiq imkanları müzakirə edilib”.
Bölmənin digər xəbərləri
