Autizm sindromlu əlilliyi olan şəxslər də reabilitasiya xidmətləri ilə təmin edilir
Bakı, 2 aprel, AZƏRTAC
Hazırda ölkəmizdə 4 minə yaxın autizm sindromlu əlilliyi olan şəxs var. Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin reabilitasiya mərkəzlərində autizm sindromlu əlilliyi olan şəxslər də reabilitasiya xidmətləri ilə təmin edilir.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, onların potensiallarına uyğun inkişafını, sərbəst yaşamaq imkanlarını dəstəkləmək məqsədilə tibbi və sosial-psixoloji reabilitasiya xidmətləri göstərilir. Bu xidmətlərə koqnitiv, nitq, özünəqulluq bacarıqlarının inkişafı məqsədilə psixoloq, loqoped, erqoterapiya yoqa, ippoterapiya, dance ability (rəqs terapiyası) və s. daxildir.
Mərkəzlərdə autizm sindromlu əlilliyi olan şəxslər ambulator xidmətlərlə yanaşı, icma əsaslı, telereabilitasiya, səyyar formalarda da reabilitasiya xidmətləri ilə təmin olunurlar.
Autizm sindromlu əlilliyi olan uşaqlar agentlik tərəfindən həftədə bir dəfə ippoterapiya (atlarla terapiya) xidmətlərinə də cəlb edilir. Beynəlxalq təcrübəyə əsaslanan bu terapiya autizm spektr pozuntusu ilə yanaşı, Daun simdromu, serebral iflic, nitq qüsurları və s. olan uşaqların sosial-psixoloji və fizioterapevtik reabilitasiyasına müsbət təsir göstərir.
Bölmənin digər xəbərləri
