AVQUSTUN 23-DƏ ÇEÇENİSTANDA DOĞULMUŞ HƏR UŞAĞA 5 MİN RUBL VERİLƏCƏK

16.08.2004 [18:18]
Çap et
A⁺ A^-

AZƏRTAC “Novosti” agentliyinə istinadla xəbər verir ki, bu il Əhməd hacı Qədirovun doğum günündə, avqustun 23-də Çeçenistanda dünyaya gələn hər uşağın valideynləri 5 min, Əhməd Hacı adı qoyulan oğlan uşaqlarının valideynləri isə 10 min rubl alacaqlar. Bunu respublika prezidentinin mətbuat xidməti bildirmişdir.

Həmin gün respublikada uşaq bağçalarının hər birinə 10 velosiped veriləcək, ictimai nəqliyyat isə sərnişinləri pulsuz daşıyacaqdır.

Bundan əlavə, Çeçenistanda Rusiya Qəhrəmanı Qədirovun adına fond da yaradılacaq, habelə onun Qudermesdə qoyulacaq tunc büstünü və Qroznıda hökumət evinin divarına vurulacaq xatirə lövhəsini hazırlamaq üçün müsabiqə elan ediləcəkdir.

Hazırda Əhməd hacı Qədirova həsr olunmuş “Əhməd” adlı bədii film çəkilməsi üzərində iş gedir.