AVROPA ÇEMPİONATINDA ÇIXIŞ EDƏCƏK AZƏRBAYCAN YIĞMASININ HEYƏTİ MƏLUM OLDU
Bakı, 17 iyun (AZƏRTAC). İyunun 25-də Almaniyanın Brandenburq şəhərində start götürəcək böyüklər arasında kayak və kanoe qayıqlarında avarçəkmə üzrə Avropa çempionatında çıxış edəcək Azərbaycan milli komandasının heyəti müəyyənləşmişdir.
Nüfuzlu yarışda ölkəmizi 4 idmançı təmsil edəcək. Azərbaycan Milli Avarçəkmə Federasiyasından bildirmişlər ki, kanoeçilərin mübarizəsində Valentin Demyanenko bir nəfərlik (C1), Sergey Bezuqlıy-Maksim Prokopenko dueti isə iki nəfərlik qayıqda (C2) çıxış edəcəklər. Demyanenko 200 və 500 metr, Bezuqlıy-Prokopenko cütlüyü isə 500 metr və 1000 metr məsafələrə yürüşlərdə qüvvələrini sınayacaqlar.
Hazırda kayak və kanoe üzrə milli komandamızın baş məşqçisi Aleksandr Kolıbelnikovun rəhbərliyi altında Polşada təlim-məşq toplanışında olan kanoeçilərimiz iyunun 23-də Brandenburqa yollanacaqlar.
Kayakçıların mübarizəsində isə yalnız Ramil Məmmədov qüvvəsini sınayacaq. O, bir nəfərlik qayıqda (K1) 500 metr və 1000 metrlik məsafələrə yürüş edəcək. R.Məmmədov qitə çempionatına kayak üzrə yeniyetmə və gənclərdən ibarət yığmamızın almaniyalı baş məşqçisi Yohan Tsülkenin rəhbərliyi altında Mingəçevirdəki “Kür” Təlim-Tədris Mərkəzində hazırlaşıb.
Avropa çempionatına iyunun 28-də yekun vurulacaqdır.
Bölmənin digər xəbərləri
