AVROPA KOMİSSİYASININ SƏDRİ AZƏRBAYCAN PREZİDENTİNƏ TƏBRİK MƏKTUBU GÖNDƏRMİŞDİR
Avropa Komissiyasının sədri Joze Manuel Barrozu Azərbaycan Respublikasının Prezidenti İlham Əliyevə təbrik məktubu göndərmişdir.
Dövlətimizin başçısını yenidən Prezident vəzifəsinə seçilməsi münasibətilə təbrik edən Avropa Komissiyasının sədri bunu Cənubi Qafqaz üçün əhəmiyyətli məqam kimi dəyərləndirir, Azərbaycanın bölgədə öz mühüm rolunu oynamağa davam edəcəyinə inandığını vurğulayır.
Cənab Barrozu bildirir ki, Azərbaycan Avropa İttifaqı ilə Yeni qonşuluq siyasətinə dair fəaliyyət planını qəbul edərək, Avropaya inteqrasiya prosesinin irəliləyişi istiqamətində öz iradəsini nümayiş etdirmişdir. Eyni zamanda, Azərbaycan Avropa İttifaqının enerji təhlükəsizliyi üçün çox mühüm və etibarlı tərəfdaşa çevrilmişdir.
Bütün bu məsələlər üzrə qarşıda duran vacib çağırışlarla bağlı Prezident İlham Əliyevin rəhbərlik rolunun böyük əhəmiyyət kəsb edəcəyini vurğulayan Joze Manuel Barrozu Yeni qonşuluq siyasətinə dair fəaliyyət planının bütün sahələri ilə bağlı məsələlərin həyata keçirilməsinin davam etdirilməsində Avropa İttifaqının Azərbaycanı dəstəkləməyə hazır olduğunu bildirir.
Ermənistan-Azərbaycan, Dağlıq Qarabağ münaqişəsinə toxunan Avropa Komissiyasının sədri ümidvar olduğunu bildirir ki, dövlətimizin başçısının yenidən Prezident seçilməsi münaqişənin sülh yolu ilə həllinə öz töhfəsini verəcəkdir.
Joze Manuel Barrozu Avropa İttifaqı ilə Azərbaycan arasında əməkdaşlığın bundan sonra da uğurla davam etdiriləcəyinə əmin olduğunu bildirmişdir.
Bölmənin digər xəbərləri
