AVROPA ŞURASI PARLAMENT ASSAMBLEYASININ YAZ SESSİYASI ÖZ İŞİNİ DAVAM ETDİRMİŞDİR
Aprelin 3-də Avropa Şurası Parlament Assambleyasının yaz sessiyası öz işini davam etdirmişdir.
AZƏRTAC-ın xüsusi müxbiri Strasburqdan xəbər verir ki, sessiyanın bugünki iclasında Avropa Şurası Nazirlər Komitəsinin sədri, Maltanın xarici işlər naziri Cozef Borç hesabat məruzəsi ilə çıxış etmişdir. Məruzədə Ermənistanda prezident seçkiləri zamanı ciddi qanun pozuntularına və saxtakarlığa yol verilməsi məsələsinə toxunulmuş, may ayında Ermənistanda keçiriləcək parlament seçkilərinə və oktyabrda Azərbaycanda prezident seçkilərinə Avropa Şurasının xüsusi diqqət yetirəcəyi deputatların nəzərinə çatdırılmışdır.
Qaydalara görə, sədr ayrı-ayrı deputatların xüsusi sənəd olaraq nəşr edilmiş suallarına cavab vermişdir. Nəşr olunmuş 16 sualdan birinin müəllifi Milli Məclisin deputatı Rafael Hüseynov olmuşdur. Onun sualında İraq problemi ilə əlaqədar AŞPA-nın bir neçə dəfə müzakirələr keçirdiyi halda, Nazirlər Komitəsinin indiyə qədər bu məsələyə öz münasibətini bildirməməsi əksini tapmışdır.
Sədr bu məsələ ilə bağlı Nazirlər Komitəsində tezliklə müzakirələr keçiriləcəyini bildirmişdir.
X X X
Həmin gün azərbaycanlı deputatlardan Bəxtiyar Əliyev, Rafael Hüseynov, Nairə Şahtaxtinskaya və Asim Mollazadə müxtəlif komitələrin yığıncaqlarında iştirak etmiş, müzakirə olunan məsələlərə öz münasibətlərini bildirmişlər.
Sessiya öz işini davam etdirir.
Əsgər Əliyev
AZƏRTAC-ın xüsusi müxbiri
Strasburq
Bölmənin digər xəbərləri
