Avropa Şurasının komitə iclasında Azərbaycana qarşı qərəzli mövqe tənqid edilib
Paris, 5 dekabr, AZƏRTAC
Avropa Şurası Parlament Assambleyasının (AŞPA) qış sessiyası ərəfəsində qurumun Parisdəki qərargahında mədəniyyət, elm, təhsil və media komitəsinin növbəti iclası keçirilib. Avropanın mədəni və siyasi həyatı ilə əlaqədar bir sıra mühüm məruzələrin müzakirəsi ilə davam edən toplantıda ən çox maraq və geniş diskussiyalar doğuran mövzu yenə mətbuatla bağlı idi. Xorvatiyalı deputat Qvozden Fleqonun hazırladığı “Avropada mətbuat azadlığının qorunması” adlı məruzənin qətnamə layihəsi və mətninin təsdiq edilmək üçün səsverməyə qoyulmasından əvvəl ətraflı müzakirəsi aparıldı.
Məruzədə Azərbaycana da yer ayrıldığından komitənin üzvü Rafael Hüseynov həmin müzakirələrdə çıxış edərək məruzədəki bir sıra mübahisəli, qeyri-obyektiv məqamları kəskin tənqid edib. Belə həssas məsələlərdə yoxlanılmış faktlara əsaslanmağın və son dərəcə ədalətli olmağın vacibliyini vurğulayan R.Hüseynov deyib: “Mətbuat və onun problemləri, jurnalist və onun hüquqlarının qorunması Avropa Şurasının başlıca fəaliyyət istiqamətlərindən olan insan haqları mövzusunun mühüm tərkib hissələrindəndir. Ona görə də bu qəbil məruzələrin son dövrlərdə Avropa Şurası gündəliyində daim yer alması məntiqlidir. Lakin belə məruzələrin hazırlanmasında hər dəfə son dərəcə diqqətli olmaq, ikili standartlardan uzaq, ədalətli yanaşmaların əks etdirilməsinə çalışmaq lazımdır. Təəssüf ki, təqdim olunan məruzədə yenə tərəzinin gözü məqsədli şəkildə, ya da bilməyərəkdən əyilib, bir sıra faktlar təhrif edilib, qərəzli mövqelər əksini tapıb. Məruzə Avropada mətbuatın vəziyyəti və təhlükəsizliyi məsələsini araşdırmağı hədəf götürsə də, nədənsə 4 ölkə üzərində dayanılaraq Rusiya, Ukrayna, Türkiyə, Azərbaycandan uzun-uzadı bəhs edilir, çox ciddi problemləri olan bir çox ölkələrin adı belə çəkilmir. Sizin üçün Avropa mətbuatı yalnız elə bu 4 ölkə deməkdirmi, ya digər Avropa ölkələrində mətbuata olan təzyiqlər, jurnalistlərə qarşı haqsızlıqlar sizi narahat etmirmi? Bizə diqqətinizə görə sağ olun, bəs o biri Avropa ölkələrinə qarşı niyə biganəsiniz? Təkcə 2014-cü ildə 80 nəfər jurnalist öldürülüb. Azərbaycanda yox, başqa ölkələrdə. 12 səhifəlik məruzənin 3 səhifəsi Azərbaycana, 4 səhifəsi Türkiyəyə həsr edilib. Gətirilən faktların da çoxu yanlış, qüsurludur. Bunun əvəzinə həmin jurnalistlərin qətlə yetirildiyi ölkələri diqqətə çəkmək daha düzgün olmazdımı?”
R.Hüseynov bildirib ki, Azərbaycanda kifayət qədər azad, inkişaf etmiş mətbuat var, mətbuata və mətbuat xadimlərinə dövlət qayğısı ən yüksək səviyyədədir və bunu təsdiqləyən saysız faktlar göz qabağındadır. Sadəcə, bunları görmək istəmək lazımdır.
Deputat deyib: “Mövzuya, məruzəyə heç bir aidiyyəti olmadan mətnə 2013-cü ildə Azərbaycanda xalqın böyük mütəşəkkilliyi şəraitində keçirilmiş, demokratik, azad, şəffaf prezident seçkiləri ilə bağlı ATƏT-in mübahisəli, qərəzli, ciddi tənqidlərə məruz qalmış rəyindən mövqeyi daxil edirsiniz. Həmin seçkilərlə bağlı AŞPA-nın müsbət, obyektiv, seçkiləri yüksək qiymətləndirən yekun rəyi var və onu Parlament Assambleyasında sizinlə birlikdə səs verərək qəbul etmişik. Əgər açıq-aşkar qərəz yoxdursa, niyə bu barədə susursunuz? Beləliklə, məruzənin mətnindəki 147-ci bənd də hökmən çıxarılmalıdır.
Eyni qərəzli münasibət məruzədə Türkiyə, Macarıstan və digər ölkələrə münasibətdə də müşahidə edilməkdədir. Mətbuatın acınacaqlı vəziyyətdə olduğu Ermənistandan isə bəhs edilmir. Bu məruzə konkret bir şəxs tərəfindən imzalansa da, Avropa Şurasının adından hazırlanır, ona görə onun hər ifadəsi, hər cümləsi, hər iddiası subyektiv, qərəzli, qondarma mülahizələrə deyil, yoxlanılmış, dürüst dəlillərə əsaslanmalıdır”.
Müzakirəyə qatılan deputatlar - türkiyəli Reha Denemeç, rusiyalı Robert Şleqel, macarıstanlı Marton Gyöngyösi də deyilənlərə şərik çıxaraq məruzədə ikili standartların, məqbul sayıla bilməyəcək qənaətlərin yer aldığını, mətndə müəyyən ölkələrə təzyiq göstərmək təşəbbüslərinin olmasını ciddi nöqsan kimi vurğulayıblar.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
