Avstraliyanın cənub-şərqində meşə yanğını riskinə görə məktəblər bağlanıb
Bakı, 13 fevral, AZƏRTAC
Avstraliyanın cənub-şərqində meşə yanğınları təhlükəsi səbəbindən 40-a yaxın orta məktəb, həmçinin 20 uşaq bağçası bağlanıb.
AZƏRTAC xəbər verir ki, bu barədə Viktoriya ştatının hökuməti məlumat yayıb.
Ştatın Təhsil Nazirliyinin məlumatına görə, ekstremal hava şəraiti ilə əlaqədar Meteorologiya Bürosu və Fövqəladə Hallar Xidməti meşə yanğınları riski olan ərazilərdə yerləşən məktəblərin bağlanmasını tövsiyə edib.
Bildirilir ki, qitənin şərqində həddindən artıq isti və quru hava şəraiti ən azı həftə sonunadək davam edəcək. Viktoriya ştatında havanın hərarətinin 30 dərəcəyə çatacağı, bəzi ərazilərdə isə 40 dərəcəni ötəcəyi gözlənilir. Eyni zamanda, bölgədə şimşək çaxacağı, sürəti saniyədə 22-23 metrə çatan güclü külək əsəcəyi proqnozlaşdırılır. Bütün bunlar meşə yanğınları riskini artırır. Hakimiyyət orqanları əhalini ehtiyac yaranmadığı təqdirdə səyahətlərdən çəkinməyə, meşələrə və parklara girməməyə çağırıb.
Bölmənin digər xəbərləri
