AVSTRİYADA NÖVBƏTİ PREZİDENTİNANDİÇMƏ MƏRASİMİ KEÇİRİLMİŞDİR
AZƏRTAC-ın Almaniyadakı xüsusi müxbiri Vyanadan yayılan məlumatlara istinadla xəbər verir ki, iyulun 8-də Avstriya parlamenti konstitusiya qanunlarına uyğun olaraq ölkənin yeni federal prezidenti Hans Fişerin rəsmi andiçmə mərasimini keçirmişdir. Sosial demokratların namizədi 66 yaşlı Fişer ölkənin bu ilin may ayında xalq tərəfindən seçilmiş qanuni prezidentidir. Hans Fişer iyulun 8-dən etibarən dövlət başçısı postunda iki gün bundan öncə dünyasını dəyişmiş mərhum sabiq federal prezident Tomas Klestili əvəz etməyə başlamışdır. Matəm mərasimi günləri çərçivəsində keçən inauqurasiyadan sonra Avstriya Respublikasının federal kansleri Volfqanq Şüssel mərhum prezident Tomas Klestilin vəfatı ilə bağlı matəmin davam etdiyini bildirmişdir. Mərhum sabiq prezident Tomas Klestilin cənazəsi iyulun 9-da torpağa tapşırılacaqdır.
