Bakı, 23 dekabr, Aysel Azad, AZƏRTAC

Müasir dövrdə avtomobil istifadəçilərinin sayı durmadan artır. Bu isə avtomobil təmirçilərinə olan tələbatın yüksəlməsinə səbəb olur. Bu sənəti usta yanında öyrənməyə çalışanlar olsa da, peşə məktəbində nəzəri biliklərlə yiyələnmək istəyənlər də az deyil.

AZƏRTAC-ın əməkdaşı Sənaye və İnnovasiyalar üzrə Bakı Dövlət Peşə Təhsil Mərkəzində avtomobillərin təmiri üzrə təhsil alan tələbələrlə həmsöhbət olub.

Mərkəzdə bu sahə üzrə avtomobil elektrik, avtomobillərin təmiri çilingəri, avtomobil diaqnostikası və təmiri ustası kimi ixtisaslar tədris olunur. Burada müxtəlif yaş qruplarında tələbələr təhsil alırlar. Əksəriyyəti isə məhz avtomobil işinə maraq və sevgisindən mərkəzə üz tutduğunu bildirir.

Yaradıldığı gündən təhsil müəssisəsində müəllim kimi çalışan Elmar Baxşıyev deyir ki, 10-dan çox bölmənin cəmləşdiyi mərkəzdə ən çox tələbə avtomobil ixtisası üzrə təhsil alır. Onun sözlərinə görə, hazırda avtomobil ixtisası üzrə 8 qrup var və hər qrupda 20 tələbə təhsil alır: “Azərbaycan Texniki Universitetinin (AzTU) avtomobil mühəndisliyi ixtisasını bitirmişəm. Cənubi Koreya Respublikasında “Hyundai” şirkətində, daha sonra isə Türkiyədə təlimlərdə iştirak etmişik. Tədrisin gedişatında dərslərin 30 faizi nəzəri, qalan hissəsi isə praktiki olaraq həyata keçirilir”.

Ancaq səslənən rəqəmlərə əsasən qrupda şagirdlərin sayı az idi. Bildirildi ki, emalatxana geniş olmadığına görə tədrisin daha keyfiyyətli olması üçün qruplar növbəli şəkildə cəlb olunurlar. Bununla yanaşı, təcrübə müddətinin bir qismi mərkəzin emalatxanasında, digər qismi isə qruplar arasında bölünərək təhsil müəssisəsinin əməkdaşlıq etdiyi servislərdə təşkil olunur. Tələbələr həmin servislərə qrup şəklində həftə ərzində 2-3 gün arasında gedirlər.

Elmar Baxşıyev deyir ki, mərkəzdə ixtisas peşə təhsil səviyyəsində öyrədilsə də, tələbələr təhsil müddətini başa vurduqdan sonra asanlıqla ali məktəbə üz tuta bilərlər. Bu fürsət 3 illik subbakalavr təhsili alan tələbələrə aiddir: “Tədris müddəti ümumilikdə 1 illik və 3 illik subbakalavr təhsili olaraq ayrılıb. Birillik təhsil alan tələbələrimiz 11-ci sinif məzunlarıdır, onlar ilin yekununda imtahan verərək diplom alırlar. Doqquzuncu sinfi başa vurub gələnlər isə 3 illik subbakalavr təhsili alırlar. Həmin tələbələrin proqramı daha geniş olduğuna görə onlar təhsillərini başa vurduqdan sonra universitetlərə keçid edə bilirlər. Həmçinin təklif var ki, növbəti illərdə subbakalavr kimi bu sahəni bitirən tələbələr ali məktəbdə birbaşa olaraq 2-ci kursda təhsillərini davam etdirsinlər. Ümidvarıq ki, yaxın zamanda bu təklif reallaşacaq”.

Mərkəzdə olduğumuz müddətdə bir neçə avtomobil təmir üçün emalatxanaya daxil oldu. Bəs, bu avtomobillər haradan gətirilir? Elmar Baxşıyev deyir ki, Sənaye və İnnovasiyalar üzrə Bakı Dövlət Peşə Təhsil Mərkəzi Cənubi Koreya layihəsi əsasında yaradılıb. Buna görə avadanlıqların çoxu Koreya istehsalıdır: “Mərkəzin təlim təşkil etməsi üçün Koreya tərəfindən təqdim edilən 10 avtomobil var. Bütün təlim prosesləri bu avtomobillərin üzərində həyata keçirilir. Bununla yanaşı, müqavilə əsasında təmir prosesinə dövlət müəssisələri, əsasən də Elm və Təhsil Nazirliyinin avtomobilləri cəlb edilir. Müqaviləyə əsasən də təmir qarşılığında ödəniş edilir”.

Mərkəzdə qızların da avtomobil ixtisasına cəlb olunması nəzərdə tutulub. “Avtomobil ixtisasına hazırda qızların qəbulu elə də çox deyil. Bunu işin ağırlığı ilə əlaqələndiririk. Satış mərkəzlərində çalışan xanımların avtomobil haqqında daha geniş biliyə sahib olması üçün yeni modul hazırlanır. Ola bilər ki, gələcəkdə tədris bu modul əsasında aparılsın və qızlar da bu sahəyə cəlb edilsin”, - deyə Elmar Baxşıyev bildirib.

Mərkəzdə avtomobil ixtisası üzrə 14 yaşdan 55 yaşadək tələbələr təhsil alırlar. Servisdə təcrübədə olduqlarına görə adı çəkilən yaş qrupları ilə söhbətləşə bilmədik. Ona görə də, sonuncu kursda təhsil alan 23 yaşlı Cavad Qocayevlə həmsöhbət olduq. Cavad deyir ki, təhsilinin bir ili karantin dövrünə təsadüf edib: “Bir il altı aydır ki, avtomobillər üzərində işləyirik. Buradan sonra hədəfim AzTU-nun mühəndislik ixtisasında oxumaqdır. Gələcəkdə mühəndis kimi avtomobil sahəsində ölkəmə xidmət etmək istəyirəm”.

İkinci kursda təhsil alan 16 yaşlı Gülağa Ələkbərlinin bu sahəyə marağı ailəsindən gəlir. Atası 25 ildən çoxdur ki, avtomobil ustasıdır. Gülağa avtomobili daha dərindən öyrənmək üçün peşə məktəbinə üz tutub: “Uşaqlıqdan marağım olduğu üçün sərbəst şəkildə avtomobillər üzərində çalışa bilirəm. Ali səviyyədə təhsilimi davam etdirmək istəyərəm, fikrimcə, ixtisas haqqında bilikləri təkmilləşdirməyin ziyanı yoxdur. Məqsədim yeni təkmilləşmiş avtomobillərin üzərində işləməkdir. Gələcəkdə şəxsi avtomobil servisimi açmaq istəyirəm”.

Gülağa tədris müddətində öyrəndiklərini evdə atası ilə bölüşür: “Atam dizel maşınları üzrə ixtisaslaşıb, köhnə qaydada işləyib, elektrik sistemindən məlumatsızdır. Mən avtomobillərin diaqnostikasını öyrənirəm. Buna görə də müasir avtomobillərlə bağlı fikirlərimi atamla bölüşürəm. Hələlik bilmədiklərim çoxdur, öyrənməyə çalışıram”.

Uğur əldə etmək üçün təhsil almaq çox vacibdir. Amma əsası odur ki, seçdiyin peşəni sevəsən. Onda özünü doğrulda bilərsən.