Azərbaycan 2025-ci il üçün Rusiyada turizm potensialının inkişafı üzrə siyahıya daxil olub
Moskva, 15 oktyabr, AZƏRTAC
Azərbaycan 2025-ci il üçün Rusiyada turizm potensialının inkişafı üzrə ölkələr siyahısına daxil olub.
AZƏRTAC xəbər verir ki, Rusiyanın İqtisadi İnkişaf Nazirliyi Strateji Araşdırmalar Mərkəzi (SAM) ilə birlikdə 2025-ci il üçün turizm potensialının inkişafında hədəf ölkələri müəyyən edib. Soçidə keçirilən birinci beynəlxalq aviasiya və turizm forumunun platformasında çıxış edən SAM Beynəlxalq Turizmin İnkişafı Mərkəzinin direktoru Yuliya Maksutova bildirib ki, sıralamada Azərbaycan, Türkiyə, Belarus, Qazaxıstan, Özbəkistan və başqalarının adı var.
O əlavə edib ki, 2024-cü ildə Rusiya Federasiyasında ərəb turistlərin sayında artım müşahidə olunur. Qeyd edək ki, oktyabrın 25-də Moskvada ölkəmizin bütün turizm məhsullarını təbliğ edəcək Azərbaycanın Rusiyadakı turizm nümayəndəliyinin açılış mərasimi keçiriləcək. Mərasimdə Azərbaycan Dövlət Turizm Agentliyinin sədri Fuad Nağıyev, Rusiya İqtisadi İnkişaf Nazirliyinin, Moskva meriyasının, turizm sektorunun aparıcı şirkətlərinin nümayəndələri iştirak edəcəklər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
