“Azərbaycan - müharibənin qalibi, sülhün müəllifi” mövzusunda konfrans keçirilib
Bakı, 7 oktyabr, AZƏRTAC
Oktyabrın 7-də Müharibə, Əmək və Silahlı Qüvvələr Veteranları Təşkilatında şəhid ailələrinin, veteranların, tələbələrin, zabitlərin və ziyalıların iştirakı ilə “Azərbaycan - müharibənin qalibi, sülhün müəllifi” mövzusunda konfrans təşkil olunub.
Tədbirdən öncə Dövlət Himni səsləndirilib, Ümummilli Lider Heydər Əliyevin və Azərbaycanın müstəqilliyi, ərazi bütövlüyü uğrunda canlarından keçmiş şəhidlərin əziz xatirəsi 1 dəqiqəlik sükutla yad edilib.
Təşkilatdan AZƏRTAC-a verilən məlumata görə, konfransda çıxış edən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov Müzəffər Ali Baş Komandan, Prezident İlham Əliyevin rəhbərliyi ilə xalqımızın 44 günlük Vətən müharibəsində əldə etdiyi tarixi Qələbəyə diqqət çəkib, bu Zəfərin hərbi önəmi ilə yanaşı, iqtisadi-siyasi və mənəvi əhəmiyyətinə toxunub: “Prezident İlham Əliyevin liderliyi ilə Silahlı Qüvvələrimizin 44 günlük Vətən müharibəsində əldə etdiyi Zəfər, eləcə də, 2023-cü ildə həyata keçirilən suverenliyin tam bərpası əməliyyatı böyük hərbi, tarixi, siyasi və mənəvi əhəmiyyətə malikdir. Bu qələbələr göstərdi ki, Azərbaycan xalqı və dövləti öz ərazi bütövlüyünü təmin etməyə, suverenliyini qorumağa qadirdir və heç vaxt heç bir təzyiq qarşısında boyun əyməyəcək. Azərbaycan dövləti müharibədən öncə olduğu kimi, postmüharibə dönəmində də sülh səylərini aktiv şəkildə davam etdirdi. Prezident İlham Əliyevin rəhbərliyi ilə diplomatlarımızın apardığı sülh uğrunda mübarizə cari il avqustun 8-də Vaşinqtonda Azərbaycanla Ermənistan arasında sülh müqaviləsi mətninin paraflanması ilə yekunlaşdı. Dövlətimiz müharibədə olduğu kimi, sülh müstəvisində də qələbə qazandı, milli maraqlarını uğurla təmin etdi. Azərbaycan müharibənin qalibi olmaqla yanaşı, həm də sülhün müəllifinə çevrildi”.
Tədbirdə çıxış edən Milli Məclisin deputatı, Beynəlxalq münasibətlər və parlamentlərarası əlaqələr komitəsinin sədr müavini Nigar Arpadarai Azərbaycanın həm müharibə, həm də diplomatik müstəvidəki uğurlarına diqqət çəkib. Deputat deyib ki, hər iki platformada Prezident İlham Əliyevin rəhbərliyi ilə əldə edilən zəfərlər dövlətimizin gücündən, onun mübarizə əzmindən xəbər verir. Müasir gəncliyin qalib gənclik olduğunu vurğulayan N.Arpadarai Prezident İlham Əliyevin rəhbərliyi altında xalqımızın yeni-yeni uğurlar əldə edəcəyindən əmin olduğunu bildirib.
Azərbaycan Dövlət Pedaqoji Universitetinin (ADPU) rektoru, professor Cəfər Cəfərov Prezident İlham Əliyevin rəhbərliyi ilə Silahlı Qüvvələrimizin əldə etdiyi tarixi Zəfərin önəminə toxunub, məhz bu Qələbə sayəsində ərazi bütövlüyümüzün, suverenliyimizin bərpa edildiyini vurğulayıb. 44 günlük Vətən müharibəsi şəhidləri arasında ADPU-nun da məzunlarının olduğunu bildirən rektor şəhidlərin xatirəsinin əziz tutulduğunu, onların hər zaman hörmət və ehtiramla yad edildiyini vurğulayıb.
Nərimanov Rayon İcra Hakimiyyətinin başçısı Elgin Həbibullayev də çıxışında 44 günlük Vətən müharibəsindəki tarixi Zəfərin Azərbaycanın dünyadakı nüfuzunu artırdığını, dövlətimizin inkişafı üçün yeni imkanlar və perspektivlər yaratdığını bildirib. O qeyd edib ki, müasir dövrdə müharibə yalnız hərb meydanında raketlərlə deyil, həm də sosial şəbəkələrdə, digər platformalarda aparılır. Buna görə də hər kəsin milli maraqlarımızın müdafiəsində xüsusi fəallıq və ayıq-sayıqlıq sərgiləməsi vacibdir.
ADPU-nun müəllimi, ehtiyatda olan polkovnik Qabil Talıbov, həmin universitetin tələbəsi Ülvi Həsənzadə, Azərbaycan Respublikasının Prezidenti yanında Dövlət İdarəçilik Akademiyasının tələbəsi Nəzrin Abdullayeva, 44 günlük Vətən müharibəsi veteranı Xəzər Abdullayev də haqq savaşımızdan və antiterror əməliyyatının önəmindən danışıblar. Onlar qeyd ediblər ki, məhz Azərbaycan Prezidentinin qətiyyəti, Silahlı Qüvvələrimizin fədakarlığı, xalqımızın həmrəyliyi tarixi Zəfərimizi təmin edib, uzun illər davam edən işğal probleminə son qoyub. Dövlət İdarəçilik Akademiyasının direktorunun tədris işləri üzrə müavini professor Əlikram Abdullayev də konfransda iştirak edib.
Tədbirin sonunda təhsildə fərqlənən tələbələrə fəxri fərmanlar verilib.
Bölmənin digər xəbərləri
