AZƏRBAYCAN-ABŞ HƏRBİ ƏMƏKDAŞLIĞI STRATEJİ XARAKTER DAŞIYIR
Nazir qeyd etmişdir ki, artıq Azərbaycan-ABŞ hərbi əməkdaşlığı strateji xarakter daşıyır. Bu əməkdaşlığın əsası ümummilli lider Heydər Əliyev 1997-ci ilin iyul ayında Vaşinqtona rəsmi səfəri zamanı qoyulmuşdur. 2001-ci ilin sentyabr hadisələrindən sonra isə Azərbaycan-ABŞ hərbi əməkdaşlığı sürətlə inkişaf etməyə başlamışdır.
“Azadlıq Aktı”na 907-ci düzəlişin fəaliyyəti dayandırıldıqdan sonra isə Azərbaycan-ABŞ hərbi əməkdaşlığı genişlənmişdir. Bu əməkdaşlıq indi də bir çox istiqamətlərdə davam etdirilir.
Azərbaycan-NATO münasibətlərinə toxunan müdafiə naziri bildirmişdir ki, Azərbaycan Şimali Atlantika Alyansı ilə ikitərəfli əməkdaşlığını uğurla davam etdirir. Bu əməkdaşlığın inkişaf etdirilməsində biz ABŞ-ın rolunu yüksək qiymətləndiririk. Hazırda Azərbaycan Silahlı Qüvvələrinin bölmələri Kosovo, Əfqanıstan və İraqda sülhməramlı əməliyyatlarda fəal iştrak edirlər.
Səfər Əbiyev Cənubi Qafqazda mövcud olan hərbi-siyasi vəziyyət haqqında danışaraq bildirmişdir ki, regionda vəziyyət olduqca gərgindir. Ermənistan-Azərbaycan, Dağlıq Qarabağ münaqişəsi hələ də öz həllini tapmamışdır, məsələnin həlli ilə məşğul olan ATƏT-in Minsk qrupunun fəaliyyəti qənaətbəxş deyildir. Biz münaqişənin beynəlxalq hüquq normaları əsasında, Azərbaycanın ərazi bütövlüyü çərçivəsində həll edilməsini istəyir və Ermənistan silahlı qüvvələrinin işğal olunmuş ərazilərdən çıxmasını tələb edirik. Münaqişənin həllində Ermənistan tərəfi destruktiv mövqe tutaraq özünü mövcud situasiyaya uyğun aparmır. Azərbaycan bu vəziyyəti nəzərə alaraq adekvat tədbirlər görmək məcburiyyətindədir.
Harri Vyatt Azərbaycanın qlobal terrorizmlə mübarizədə fəal iştrakına görə Azərbaycan xalqına və dövlətinə təşəkkür edərək demişdir: “Azərbaycan Silahlı Qüvvələrinin bölmələrinin İraqda, Əfqanıstanda və Kosovoda ABŞ Silahlı Qüvvələrinin əsgərləri ilə bir yerdə xidmət etməsini biz Azərbaycan xalqının böyük uğuru kimi qiymətləndiririk. Sizin gözəl Silahlı Qüvvələriniz və çox intizamlı əsgərləriniz vardır. Azərbaycan Silahlı Qüvvələri ilə fəxr edə bilərsiniz”.
General-mayor H.Vyatt qeyd etmişdir ki, biz sülhməramlı əməliyyatlar zamanı bir-birimizin təcrübəsindən öyrənirik. İnanırıq ki, Azərbaycan iqtisadi baxımdan inkişaf etdikcə onun Silahlı Qüvvələrinin sülhməramlı əməliyyatlarda iştirakı da güclənəcəkdir.
Azərbaycan-NATO əməkdaşlığına münasibət bildirən qonaq, bu əməkdaşlığı Fərdi Tərəfdaşlığın Fəaliyyət Planı səviyyəsində davam etdirilməsini təqdir etmişdir.
ABŞ Prezidenti Corc Buşla Azərbaycan Prezidenti İlham Əliyevin son görüşündən bəhs edən Harri Vyatt bildirmişdir ki, Prezident İlham Əliyev görüşdə Azərbaycanın demokratik və dünyəvi dövlət olmaq əzmini xüsusi vurğulamışdır. ABŞ dövləti bu səyləri çox yüksək qiymətləndirir və sizə bu yolda uğurlar arzulayır. O, Ermənistan-Azərbaycan münaqişəsinin həllinə toxunaraq qeyd etmişdir ki, ABŞ Azərbaycanın ərazi bütövlüyünü SSRİ-dən qalmış sərhədlər çərçivəsində dəstəkləmiş və dəstəkləyir, münaqişənin diplomatik yolla həllini arzulayır. ABŞ Azərbaycanın bu istiqamətdə apardığı səylərə yüksək qiymət verir və biz sizə bu yolda yardım etməyə hazırıq. İnanırıq ki, Azərbaycan möhkəm mövqeyini və iradəsini danışıqlar masası arxasında da nümayiş etdirəcəkdir.
Azərbaycan-ABŞ hərbi əməkdaşlığının perspektivləri ətrafında geniş fikir mübadiləsinin aparıldığı görüşdə ABŞ-ın ölkəmizdəki səfiri xanım Ann Ders iştirak etmişdir.
Bölmənin digər xəbərləri
