Azərbaycan-ABŞ münasibətlərinə dair yeni kitab nəşr edilib
Bakı, 7 oktyabr, AZƏRTAC
Beynəlxalq Münasibətlərin Təhlili Mərkəzi (BMTM) tərəfindən “Azərbaycan-ABŞ münasibətləri: Strateji tərəfdaşlığa doğru yeni kursun müəyyənləşdirilməsi” kitabı nəşr olunub.
BMTM-dən AZƏRTAC-a verilən məlumata görə, mərkəzin şöbə müdirləri Vasif Hüseynov, Şahmar Hacıyev və baş məsləhətçi Yunis Qurbanovun həmmüəllifləri olduqları nəşrdə ortaq maraqlara və konstruktiv əməkdaşlığa əsaslanan Azərbaycan-ABŞ münasibətlərinin inkişaf prosesi araşdırılır, dövlətlər arasında müxtəlif sahələr üzrə əməkdaşlıq ətraflı şəkildə təhlil edilir.
Kitabın ön sözünün müəllifi BMTM-in İdarə Heyətinin sədri, səfir Fərid Şəfiyev avqustun 8-də Vaşinqtonda ABŞ Prezidenti Donald Trampın vasitəçiliyi ilə Azərbaycan Prezidenti İlham Əliyev və Ermənistan Baş naziri Nikol Paşinyan arasında keçirilən üçtərəfli sammiti tarixi dönüş nöqtəsi kimi xarakterizə edib. Bildirib ki, bu sammit Azərbaycan və Ermənistan arasında uzun müddətdir davam edən sülh prosesini irəlilətməklə yanaşı, ABŞ-ın bölgənin gələcəyinin formalaşmasında yenidən əsas rol oynadığını da nümayiş etdirib.
“Azərbaycan tərəfindən uzun müddət müdafiə olunan prinsiplərə əsaslanan sülh müqaviləsinin paraflanması münaqişə və məcburi köçkünlük kimi ağrılı mərhələnin sonlanmasına gətirib çıxarıb, sabitlik, rifah və inteqrasiyaya yol açıb”, - deyə F.Şəfiyev vurğulayıb.
Kitabın “Azərbaycan-ABŞ münasibətlərində yeni mərhələnin əsasının qoyulması”, “Ermənistan-Azərbaycan münaqişəsi kontekstində ABŞ-Azərbaycan münasibətləri”, “Qeyri-enerji sektorlarında iqtisadi əməkdaşlıq və əlaqəlilik” bölmələri şöbə müdiri Vasif Hüseynov, “Enerji sahəsində əməkdaşlıq strateji tərəfdaşlığın əsas sütunu kimi” bölməsi şöbə müdiri Şahmar Hacıyev, “İkitərəfli əlaqələrin tarixi inkişaf yolu” bölməsi isə baş məsləhətçi Yunis Qurbanov tərəfindən hazırlanıb.
Nəşrin nəticə və tövsiyələr bölməsində Azərbaycan-ABŞ münasibətlərinin keyfiyyətcə yeni mərhələyə qədəm qoyduğu vurğulanıb. Bildirilib ki, uzun müddət neft-qaz sektoru və enerji təhlükəsizliyi üzərində qurulan bu münasibətlərdə artıq qeyri-enerji sektoru, ticarətin şaxələndirilməsi, TRIPP dəhlizi, süni intellekt, rəqəmsal innovasiyalar, kosmik tədqiqatlar və təhsil əsas prioritetlərə çevrilib.
Bölmənin digər xəbərləri
