Azərbaycan Ağsaqqallar Şurası nəcib əməlləri davam etdirir
Bakı, 22 mart, AZƏRTAC
Ölkəmizdə şəhid ailələri, müharibə əlilləri, veteranlar və hərbi qulluqçuların sosial müdafiəsinin təmin edilməsi, onların rifah halının yüksəldilməsi və problemlərinin həlli Azərbaycan Respublikasının Prezidenti İlham Əliyevin uğurla həyata keçirdiyi dövlət siyasətinin mühüm tərkib hissəsini təşkil edir. Belə ki, həmin şəxslərə maliyyə dəstəyi göstərilir, onlar mənzillərlə, minik avtomobilləri ilə təmin edilir, müalicə olunmaları və sosial durumlarının yaxşılaşdırılması istiqamətində ardıcıl işlər görülür. Dövlətimizin başçısı İlham Əliyevlə yanaşı Birinci vitse-prezident Mehriban xanım Əliyevanın da müvafiq göstərişləri və təşəbbüsləri əsasında ölkəmizdə bu kateqoriyadan olan insanların problemləri ilə daim yaxından maraqlanır və onların aradan qaldırılması üçün mütəmadi təsirli tədbirlər həyata keçirilir.
Bu dəstək təşəbbüsünə qoşulan Azərbaycan Ağsaqqallar Şurası Milli Məclisin deputatı Eldar Quliyevin sədrliyi ilə xeyirxahlıq və humanizm prinsiplərinə uyğun olaraq xalqımıza xas yardım ənənələrini davam etdirir, şəhid ailələrinin, hərbi əməliyyat iştirakçılarının zəruri ehtiyaclarının təmin edilməsinə xüsusi həssaslıqla yanaşır və bu məsələyə öz töhfəsini verməyə çalışır. Elə bu günlərdə Sabunçu rayonunun Maştağa, Bilgəh, Nardaran və Zabrat qəsəbələrində Respublika Ağsaqqallar Şurası tərəfindən Azərbaycanın ərazi bütövlüyü uğrunda gedən döyüşlərdə şəhidlik zirvəsinə yüksəlmiş və yaralanmış əsgər və zabitlərin ailələri, həmçinin köməyə ehtiyacı olan, uşaqlıqdan əlillikdən əziyyət çəkən bəzi xəstə insanların ailələri ziyarət edilib, onlara 22 kiloqramlıq ərzaq məhsullarından ibarət yardım payları təqdim edilib.
Qurumun mətbuat xidmətindən AZƏRTAC-a verilən məlumata görə, ümumilikdə 120 ailəyə baş çəkərək qayğıları ilə maraqlanan Azərbaycan Ağsaqqallar Şurasının Aparat rəhbəri Ramin Həsənli, Milli Məclisin deputatı Eldar Quliyevin köməkçisi Yaşar Məmmədov və Şuranın Baş məsləhətçisi Kamal Əliyev Respublika Ağsaqqallar Şurasının sədri, millət vəkili Eldar Quliyevin salamlarını onlara çatdırıb, uca Allahdan Vətən uğrunda döyüşlərdə misilsiz şücaət və rəşadət göstərmiş şəhidlərimizə rəhmət, yaralılara şəfa diləyiblər. Qeyd edilib ki, bu istiqamətdə görülən işlərə, nəcib təşəbbüslərə öz töhfəsini əsirgəməyən Azərbaycan Ağsaqqallar Şurası Eldar Quliyevin rəhbərliyi ilə bundan sonra da şəhid ailələrinə, qazilərimizə diqqət və qayğı göstərəcəkdir.
Bölmənin digər xəbərləri
