Azərbaycan Ağsaqqallar Şurasının ümumi iclası keçirilib
Bakı, 6 iyul, AZƏRTAC
İyulun 6-da Azərbaycan Ağsaqqallar Şurasının ümumi iclası keçirilib.
Şuranın mətbuat xidmətindən AZƏRTAC-a bildirilib ki, iclasda qurumun iş planına uyğun olaraq respublikanın şəhər və rayonlarındakı yerli ağsaqqallar şuralarının 2021-ci ilin mart-iyun aylarında keçirilən hesabat-seçki konfranslarının yekunları müzakirə olunub, Azərbaycan Ağsaqqallar Şurası sədrinin müavinlərinin məruzələri dinlənilib.
Azərbaycan Ağsaqqallar Şurasının sədri, Milli Məclisin deputatı, iqtisad elmləri doktoru, professor Eldar Quliyev ölkə ağsaqqallarının cəmiyyətimizdə gedən ictimai proseslərdə yaxından iştirak etdiyini, ölkəmizin inkişafına, Prezident İlham Əliyevin yürütdüyü siyasətə, islahatlar kursuna birmənalı dəstək verdiklərini diqqətə çatdırıb. Bildirilib ki, pandemiyanın yaratdığı çətinliklərə baxmayaraq, Azərbaycan Ağsaqqallar Şurası qarşısında duran vəzifələri uğurla həyata keçirir, ölkənin ictimai həyatına öz töhfələrini verir. Rayon və şəhərlərdə yerli ağsaqqallar şuralarının hesabat-seçki konfransları da pandemiya dövrünün tələblərinə uyğun şəkildə keçirilib.
Şura sədri qeyd edib ki, Prezident İlham Əliyevin rəhbərliyi ilə Azərbaycan dövləti və xalqı tarixinin olduqca şərəfli dövrünü yaşayır. Qırx dörd günlük Vətən müharibəsi Azərbaycanın Qələbəsi ilə başa çatıb. Prezident İlham Əliyevin Ali Baş Komandanlığı ilə torpaqlarımız müharibə yolu ilə işğaldan azad olunub. Bu gün hər bir azərbaycanlı qalib və qəhrəman xalqın nümayəndəsi olması ilə fəxr edir.
Bildirilib ki, işğaldan azad olunmuş torpaqlarımızda hazırda genişmiqyaslı yenidənqurma işləri həyata keçirilir. Bu günlərdə Ermənistanın Füzuli və Zəngilan rayonlarının minalanmış ərazilərinin xəritələrini Azərbaycana verməsini Prezident İlham Əliyevin növbəti böyük uğuru kimi dəyərləndirən Eldar Quliyev deyib ki, bu xəritələrin alınması həmin ərazilərdə həyata keçirilən quruculuq işlərini daha da sürətləndirəcək. Eyni zamanda, minalarla bağlı xəritələrinin əldə edilməsi Qarabağda kommunikasiya xətlərinin yaradılması üzrə həyata keçirilən layihələrin də sürətlə yerinə yetirilməsinə səbəb olacaq.
İclasda ötən il vəfat edən Azərbaycan Ağsaqqallar Şurasının keçmiş sədri Fəttah Heydərovun xatirəsi bir dəqiqəlik sükutla yad edilib. Eldar Quliyev bildirib ki, Azərbaycan Ağsaqqallar Şurasının fəaliyyətinin daha da canlanmasında, onun ölkənin ictimai həyatında fəal rol oynayan quruma çevrilməsində Fəttah Heydərovun böyük xidmətləri olub.
2021-ci ilin mart-iyun aylarında keçirilən hesabat-seçki konfransları barədə danışan Eldar Quliyev diqqətə çatdırıb ki, Azərbaycan Ağsaqqallar Şurası sədrinin müavinləri arasında bölgü aparılıb və onlar bölgələr üzrə yerli ağsaqqallar şuralarının konfranslarında iştirak ediblər. Ümumilikdə işğaldan azad olunmuş rayonlar istisna olunmaqla, 77 şəhər və rayonda seçkilər keçirilib. Konfranslarda rayon (şəhər) Ağsaqqallar Şuralarının yeni Əsasnamələri qəbul edilib, yerli təşkilatlara sədr və İdarə Heyətinin, o cümlədən Təftiş komissiyalarının üzvləri seçiliblər. Seçkilər azad və demokratik şəraitdə keçirilib, rayon və şəhərlərin ictimaiyyəti arasında nüfuzlu, işgüzar və səriştəli şəxsləri şura rəhbəri seçiliblər. Yaxın vaxtlarda Azərbaycan Ağsaqqallar Şurasında bölgələr üzrə yerli ağsaqqallar şuralarının yeni seçilmiş sədrləri ilə görüşlər keçiriləcək, onların təklifləri dinləniləcək.
Sonra çıxış edən Azərbaycan Ağsaqqallar Şurasının sədr müavinləri Əhliman Əmiraslanov, Eldar İbrahimov, Tahir Süleymanov, Vahid Novruzov, Elmira Süleymanova və Bayram Yusifov bildiriblər ki, respublikamızda tətbiq olunan karantin rejimi ilə əlaqədar olaraq kütləvi tədbirlər keçirilməsi məqsədəuyğun olmadığına görə konfranslar məhdud sayda nümayəndələrin iştirakı ilə keçirilib. Hər bir konfransda Azərbaycan Ağsaqqallar Şurası sədrinin müavini, müvafiq rayon icra hakimiyyətinin rəhbərləri iştirak ediblər. Konfranslar işgüzar və demokratik şəraitdə keçib, heç bir münaqişəli hal müşahidə olunmayıb. Müzakirələr zamanı çıxış edənlər öncə 44 günlük Vətən müharibəsində möhtəşəm Qələbə qazanaraq işğal altındakı rayonların azad etdiyinə görə Azərbaycan Respublikasının Prezidenti, Müzəffər Ali Baş Komandan İlham Əliyevə dərin təşəkkürlərini ifadə ediblər.
İclasda Azərbaycan Ağsaqqallar Şurasının İdarə Heyətinin üzvləri Aqiyə Naxçıvanlı, Madər Musayev və Ziyad Səmədzadə də çıxış ediblər. Həm Ağsaqqallar Şurasının sədr müavinləri, həm də İdarə Heyətinin üzvləri ölkənin ictimai-siyasi həyatında ağsaqqalların fəal iştirakının vacibliyini qeyd edərək, şuraların qarşısında duran vəzifələrin uğurla yerinə yetirilməsi üçün təkliflər səsləndiriblər.
Çıxış edənlər xalqımızın mənəvi dünyasında, milli mentalitetində ağsaqqal sözünə, ağsaqqal xeyir-duasına həmişə böyük ehtiramla yanaşıldığını vurğulayıblar. Ailə quranda, mübahisəli məsələlərin həllində ağsaqqal sözü həmişə keçərli olub. Ağsaqqallar el-obaya müdriklik təlqin edib, gənclərə məsləhətlər veriblər. Qeyd olunub ki, bu gün ağsaqqallarımızın əsas vəzifələri müasir gəncliyimizin sağlam ruhda formalaşmasına töhfə vermək və bunun üçün gənclərlə tərbiyəvi mövzuda görüşlər keçirmək, cəmiyyətimizin inkişafı və rifahı üçün fəallıq göstərməkdir.
Çıxışlarda toxunulan məsələlərdən biri yerli ağsaqqallar şuralarının fəaliyyət göstərmələri üçün müvafiq yerlə təmin edilməsi olub. Diqqətə çatdırılıb ki, hazırda rayon və şəhər ağsaqqallar şuralarının böyük əksəriyyəti yerlə təmin olunsalar da, bəzilərində problem qalmaqdadır. Səslənən təkliflərdən biri də rayon və şəhər ağsaqqallar şuralarının maliyyələşməsi məsələsi ilə bağlı olub.
İclasa yekun vuran Eldar Quliyev bəzi rayon və şəhər ağsaqqallar şuralarının yerlə təminatı, o cümlədən maliyyələşmə məsələləri istiqamətində işlərin aparıldığı və bütün bunların ən qısa zamanda yoluna qoyulacağını bildirib.
Yekunda Azərbaycan Respublikasının rayon və şəhərlərində ağsaqqallar şurasının konfranslarının keçirilməsinə dair bölgələr üzrə təhkim olunmuş sədr müavinlərinin məlumatları nəzərə alınıb. İclasın qərarına əsasən, konfranslarda seçilmiş ağsaqqallar şuralarının sədrləri iyul-avqust aylarında İdarə Heyətinə dəvət olunacaqlar və onlara müvafiq vəsiqələr veriləcək.
İclasda Azərbaycan Ağsaqqallar Şurası tərəfindən Prezident İlham Əliyevə müraciətin qəbul edilməsi də qərara alınıb.
Bölmənin digər xəbərləri
