AZƏRBAYCAN DÖRDÜNCÜ NEFT TANKERİNİ TƏHVİL ALDI

27.07.2006 [22:31]
Çap et
A⁺ A^-

Azərbaycan Dövlət Xəzər Gəmiçiliyindən AZƏRTAC-a verilən məlumata görə, iyulun 27-də Nijni Novqoroddakı “Krasnoye Sormovo” gəmiqayırma zavodunda “Prezident Heydər Əliyev” layihəli dördüncü gəmi - ”Koroğlu” neftdaşıma tankeri Azərbaycan tərəfinə təhvil verilmişdir. Bu münasibətlə keçirilən mərasimdə tanker üzərində Azərbaycanın dövlət bayrağı qaldırılmışdır.

Tanker avqustun 1-də birbaşa Bakı buxtasına yola düşəcəkdir. Gəminin, hava şəraitindən asılı olaraq, mənzil başına 10 günə çatacağı gözlənilir.

“Çay-dəniz” tipli tankerin uzunluğu 149,9 metr, eni 17,3 metr, bortunun hündürlüyü 10,5 metr, tam yüklə sürəti saatda 11 dəniz mili, yükgötürmə qabiliyyəti 13 min tondur. Gəmi eyni vaxtda bir neçə növ neft və neft məhsulları daşımaq üçün nəzərdə tutulmuşdur.

Gəmiçiliyin sifarişi ilə zavodda inşa edilən beşinci - “Dədə Qorqud” tankerində tamamlanma işləri aparılır.