Azərbaycan Fransanın ölkəmizə qarşı neokolonializm siyasəti aparmasına imkan verməyəcək - RƏY
Bakı, 14 oktyabr, AZƏRTAC
Azərbaycanın son antiterror tədbirlərindən sonra regionda tam yeni siyasi vəziyyət yaranıb. Uzun müddət keçmiş münaqişədən istifadə edilərək ölkəmizə qarşı istifadə olunan amillər aradan qalxıb. Bu da münaqişələrdən yararlanmağa çalışan qüvvələri narahat edir. Dünyada hazırda bir neçə münaqişə ocağı mövcuddur. Bu münaqişələrin heç biri lokal, yəni, təkcə iki ziddiyyətli yerli tərəfin iştirakı ilə aparılmır. Mütləqdir ki, burada münaqişəyə öz maraqları çərçivəsində təsir edən qüvvələr olsun. Bunlar da əsasən özünü beynəlxalq qüvvə hesab edən Fransa və bir sıra digər ölkələrdir. Onlar öz siyasətlərini, regiona və ölkələrə təsirini daha çox problemlər yaradaraq və ya baş vermiş münaqişələrdə təchizatçı, yaxud vasitəçi kimi rol oynamaqla formalaşdırırlar. Ona görə də bu münaqişələr uzun müddət davam edir.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Y.Hacızadə qeyd edib ki, Azərbaycanla Ermənistan arasında keçmiş Qarabağ münaqişəsini həll etmək üçün yaradılmış ATƏT-in Minsk qrupunun həmsədrləri olan Fransa və ABŞ problemin ölkəmizin ərazi bütövlüyü kontekstində həllini qəbul edə bilmir, çünki böyük təsir mexanizmi əllərində çıxıb. Ona görə də yeni təsir vasitələri yaratmağa çalışır, münaqişənin bitmədiyini göstərmək istəyirlər. Bunun üçün də Qarabağ ermənilərini alətə çevirmə istiqamətində addımlar atılır. Beləliklə, bu dövlətlər uzunmüddətli təsir mexanizmi formalaşdırmağı planlaşdırırlar. Oktyabrın 11-də BMT-nin İnsan Hüquqları Şurasında Azərbaycan əleyhinə birgə bəyanat verilməsini də bu prizmadan qiymətləndirmək lazımdır. Bəyanatda göstərilənlər yalan və böhtan xarakterlidir, heç birin hüquqi əsası yoxdur, faktlara söykənmir.
Vurğulanıb ki, Qarabağdan gedən ermənilərin böyük əksəriyyətinin ərazi ilə tarixi bağlılığı yoxdur. Yəni, onlar bu yerlərə sonradan köçürülüblər. Eyni zamanda, gedənlərin on mindən çox hissəsi qanunsuz silahlı qüvvələrin üzvləri idi.
Torpaqlarımızın Ermənistan tərəfindən işğal edilməsini, bir milyona yaxın vətəndaşımızın, uşaqların, qadın və yaşlı insanların ölüm təhdidi altında, qış aylarında ayaqyalın məcburi köçkün vəziyyətinə salınmasının, onların hüquqlarının pozulmasının görməzdən gəlinməsini, 30 ildən sonra işğaldan azad olunmuş ərazilərə buraxılan BMT missiyasının ermənilərin getmələri ilə bağlı “Azərbaycanın heç bir təsiri olmayıb” kimi rəyini nəzərə almadan belə bir bəyanatın qəbulu Fransanın və onu imzalayan digər ölkələrin ikiüzlülüyüdür.
“BMT kimi bir qurumun İnsan Hüquqları Şurasında belə ədalətsiz, saxta əsaslara söykənən, beynəlxalq hüququn normalarından kənara çıxan bəyanatın qəbulu təşkilatın nüfuzuna, dünyada ədalətin bərpasına olan ümidlərə böyük zərbədir. Fransa, ABŞ və Almaniya kimi ölkələrin öz məqsədlərinə çatmaq üçün ədalətsiz qərarların qəbul olunmasında BMT-dən istifadə etməsi təəssüf doğurur. Çox yaxşı olardı ki, həmin ölkələr bəşər tarixinə, insanlığa vurduqları ziyanı, həyata keçirdikləri milyonlarla insan qətllərini unutmasınlar. Eyni zamanda, dünyaya “insanlıq dərsi” keçmək istədiklərində özlərinin törətdiklərini xatırlayaraq hərəkət etsinlər.
Afrikadan, Yaxın Şərqdən və Aralıq dənizi hövzəsində on illərdir taladığı xalqlar tərəfindən qovularaq çıxarılan Fransa Ermənistan vasitəsilə özünə Cənubi Qafqazda yer etmək, dünyada zəifləmiş təsirini gücləndirmək istəyir. Fransanın belə hərəkətləri regionda sülhün yaranmasına deyil, münaqişənin davam etməsinə xidmət edir. Ermənistanı silahlandıracağını bəyan edən rəsmi Paris Cənubi Qafqaza xoş məqsədlərlə, iqtisadi, mədəni münasibətlərlə deyil, siyasi təxribatlarla daxil olmaq istəyir”, - deyə o bildirib.
Politoloqun fikrincə, regionda yaranmış yeni vəziyyətdə Fransanın bölgəyə müdaxilə cəhdlərindən itirən tərəf Ermənistan olacaq. Azərbaycan Fransanın ölkəmizə qarşı neokolonializm siyasəti aparmasına imkan verməyəcək.
Bölmənin digər xəbərləri
