AZƏRBAYCAN İDMANÇILARI DÜNYA KUBOKU YARIŞINDA 32 MEDAL QAZANMIŞLAR
Bakı,18 iyun (AZƏRTAC). Аzərbaycan idmançıları Ukraynada keçirilmiş pençak silat üzrə dünya kuboku yarışında 32 medal qazanmışlar. Şərq əlbəyaxa döyüşü üzrə baş tutmuş yarışda təmsilçilərimiz 16 qızıl, 10 gümüş və 6 bürünc medala sahib olmuşlar. Azərbaycan yığması Ukrayna, Rusiya və Belarus millilərini qabaqlayaraq komanda hesabına görə 1-ci yer tutmuş və dünya Kubokuna sahib olmuşlar.
Ümumilikdə 16 komandanın tərkibində 600 idmançının mübarizə apardığı yarışda milli yığma baş məşqçi Abbas Hümbətovun rəhbərliyi ilə müxtəlif yaş qrupları və çəkilərdə 47 döyüşçü ilə təmsil olunmuşdur.
Həmçinin qızıl medalların sahiblərindən Pərvanə Ağaşirinli, Tofiq Musayev, Elxan Cəfərov və Ramiz Məmmədov yarışın ən yüksək texnikalı döyüşçü adlarını qazanmışlar.
Bölmənin digər xəbərləri
