AZƏRBAYCAN İDMANÇISI TƏVƏKKÜL BAYRAMOV AVROPANIN ƏN YAXŞI TAEKVONDOÇUSU SEÇİLMİŞDİR
Bakı, 26 yanvar (AZƏRTAC). Azərbaycan taekvondoçusu Təvəkkül Bayramov Avropa Taekvondo Birliyi (ETU) tərəfindən 2008-ci ilin ən yaxşı taekvondoçusu seçilmişdir. Azərbaycan Taekvondo Federasiyasından bildirmişlər ki, T.Bayramov ötən il “A” kateqoriyalı müxtəlif turnirlərin qalibi olduğu üçün ETU idmançımızı bu ali mükafata layiq görmüşdür. Bundan əlavə T.Bayramov müxtəlif illərdə dünya və Avropa çempionlarının mükafatçısı, qitənin ən mötəbər yarışlarının qalibi olmuş, 2008-ci ildə isə Almaniyada “A” kateqoriyalı beynəlxalq turnirdə fəxri kürsünün ən yüksək pilləsinə qalxmışdır.
Bu yaxınlarda keçiriləcək beynəlxalq yarışların birində taekvondoçuya ETU tərəfindən xüsusi kubok təqdim olunacaqdır.
Bölmənin digər xəbərləri
