AZƏRBAYCAN İLƏ KOREYA ARASINDA İQTİSADİ ƏMƏKDAŞLIQ GENİŞLƏNİR
Görüşdə rabitə və informasiya texnologiyaları naziri Əli Abbasov Azərbaycan ilə Koreya arasında əlaqələrdən danışmış və bildirmişdir ki, bu ilin may ayında Koreya Respublikasının Prezidenti Ro Mu Hyunun ölkəmizə səfəri, Azərbaycan Prezidenti İlham Əliyev ilə görüşü əlaqələrimizin yeni mərhələyə qədəm qoyması ilə nəticələnmişdir. Nazir, ölkələrimiz arasında informasiya texnologiyalarına dair memorandumun imzalanmasını bu sahədə əlaqələrin inkişafına təkan verəcəyinə əmin olduğunu bildirmişdir. Azərbaycanda neft-qaz sahəsindən sonra informasiya-kommunikasiya texnologiyaları (İKT) sektorunun prioritet olduğunu bildirən nazir, ölkəmizdə texnoparkların yaradılmasına diqqət yetirildiyini və bu istiqamətdə Koreya Respublikasının təcrübəsindən bəhrələnməyin mümkünlüyünü vurğulamışdır.
Li Von Qul may ayında tərəflər arasında imzalanmış sənədlərin icrası istiqamətində konkret addımların atıldığını bildirmişdir. Koreya Respublikasının Azərbaycan ilə əməkdaşlığa böyük önəm verdiyini bildirən nazir müavini qeyd etmişdir ki, hazırda bu əməkdaşlığın inkişaf perspektivləri nəzərdən keçirilir. O, təmsil etdiyi nazirlikdə Azərbaycan ilə əməkdaşlıq qrupunun yaradıldığını bildirmişdir. Ölkəmizlə 5 istiqamət üzrə əməkdaşlığın müəyyənləşdirildiyini qeyd edən Li Von Qul, bunlardan birinin informasiya texnologiyaları olduğunu diqqətə çatdırmışdır. Qonaq bu sahədə əməkdaşlığın Azərbaycanda İKT sektorunun inkişafına təkan verəcəyinə əmin olduğunu bildirmişdir.
Bölmənin digər xəbərləri
