AZƏRBAYCAN İLƏ MİSİR ARASINDA ƏLAQƏLƏRİN İNKİŞAFI MƏSƏLƏLƏRİ DİQQƏT MƏRKƏZİNDƏ OLMUŞDUR
Görüş əvvəlcə qapalı formatda keçirilmiş, sonra geniş tərkibdə davam etdirilmişdir. Misirli nazir Faizə Əbu Ən-Nəqə bildirmişdir ki, ölkələrimiz arasında əməkdaşlıq üçün geniş imkanlar mövcuddur. Misir Azərbaycan ilə səhiyyə, əczaçılıq, inşaat, turizm, neft və neft avadanlığı sahələrində uğurla əməkdaşlıq edə bilər. Azərbaycana 2002-ci ildə səfərini xatırladan nazir, həmin vaxt əldə olunmuş razılaşmalardan danışmış və onların ötən 3 ildə lazımınca icra olunmadığını qeyd etmişdir.
Azərbaycanın iqtisadi inkişaf naziri H.Babayev iqtisadi münasibətlərdə tərəfdaşlığın zəif inkişafının səbəblərindən danışmış və demişdir ki, Azərbaycan ilə Misir bir çox sahələrdə uğurlu əməkdaşlıq edə bilər. Lakin əməkdaşlığımızın prioritet istiqamətlərinə daha çox diqqət yetirməliyik. Ölkələrimiz arasındakı ticarət mübadiləsinin 4 milyon ABŞ dolları səviyyəsində olduğunu və bu rəqəmin heç bir vəchlə respublikalarımızın real imkanlarına uyğun gəlmədiyini qeyd edən nazir, hazırda Azərbaycanın Misirlə əczaçılıq, dərman preparatlarının idxalı sahəsində əməkdaşlığa hazır olduğunu söyləmişdir. Əməkdaşlığın perspektivlərinə toxunan nazir, Azərbaycan Dövlət Neft Akademiyasının Misirdə filialının yaradılması təklifini yüksək qiymətləndirmişdir.
İkitərəfli münasibətlərin tarixindən danışan nazir H.Babayev qeyd etmişdir ki, əlaqələrimizin bünövrəsi Azərbaycanın ümummilli lideri Heydər Əliyev və Misir Prezidenti Hüsni Mübarək tərəfındən qoyulmuşdur. Azərbaycan Prezidenti İlham Əliyev Azərbaycan ilə Misirin əlaqələrinin genişlənməsinə xüsusi diqqət yetirir.
Nazirlərin görüşündən sonra nümayəndə heyətləri imzalanması nəzərdə tutulan və müzakirədə olan sənədlər üzərində işə başlamışlar.
Həmin gün nazir H.Babayev Misirin səhiyyə naziri Avad Tacuddinlə görüşmüşdür. Nazirlər səhiyyə, əczaçılıq, vaksin preparatlarının istehsalı, ailə sağlamlığı, yoluxucu xəstəliklərlə mübarizə sahələrində ikitərəfli əməkdaşlığın perspektivlərini müzakirə etmiş, 2006-cı ilin əlaqələrimizin inkişafında mühüm mərhələ olacağını vurğulamışlar. Görüşdə nazir H.Babayev Azərbaycan Hökuməti adından və Azərbaycanın səhiyyə naziri adından misirli naziri gələn ilin birinci rübündə ölkəmizə səfərə dəvət etmişdir.
Misirli nazir A.Tacuddin dəvəti məmnuniyyətlə qəbul etdiyini bildirmiş, səfərin 2006-cı ilin ilk aylarında həyata keçiriləcəyini vurğulamış və onunla birlikdə ölkəsinin səhiyyə və əczaçılıq üzrə iş adamlarından ibarət nümayəndə heyətinin gələcəyini qeyd etmişdir.
Görüş barədə Misirin televiziya kanalları operativ informasiyalar yayımlamışdır.
Həmin gün nazir H.Babayev Misir İş Adamları Assosiasiyasında keçirilən görüşdə iştirak etmişdir. Görüşdə assosiasiyanın prezidenti Camal Nazır, Misirin beynəlxalq əməkdaşlıq naziri Faizə Əbu Ən-Nəqə və H.Babayev çıxış etmiş, səfərin ölkələrimiz üçün əhəmiyyətindən danışmışlar.
Nazir H.Babayev Azərbaycanın iqtisadi durumu, ölkəmizdə həyata keçirilən irimiqyaslı enerji və nəqliyyat layihələrindən danışmış, sualları cavablandırmışdır.
Səfərin birinci günü axşam nümayəndə heyətimizin şərəfinə verilmiş şam yeməyində də ölkələrimizin iqtisadi və siyasi münasibətlərinə dair ətraflı fıkir mübadiləsi aparılmışdır.
Səfər davam edir.
Bölmənin digər xəbərləri
