Azərbaycan İstiqlal və Milli Azərbaycan Tarixi muzeylərinə mediatur təşkil olunub VİDEO
Bakı, 23 dekabr, Fidan Əlizadə, AZƏRTAC
“Konstitusiya və Suverenlik İli” çərçivəsində dekabrın 23-də Azərbaycan İstiqlal və Milli Azərbaycan Tarixi muzeylərinə mediatur təşkil olunub.
AZƏRTAC xəbər verir ki, əvvəlcə media nümayəndələrinə Azərbaycan İstiqlal Muzeyinin direktoru Sədi Mirseyibli muzey haqqında ətraflı məlumat verib.
O qeyd edib ki, Azərbaycan xalqının dövlətçilik tarixinin, milli azadlıq mübarizəsinin, istiqlal ideyalarının və suverenlik yolunun elmi əsaslarla toplanması, öyrənilməsi və nümayiş etdirilməsi məqsədilə 1918-ci ildə (1991-ci ildə yenidən fəaliyyətə başlayıb) yaradılan ilk muzey məhz Azərbaycan İstiqlal Muzeyidir.
S.Mirseyibli vurğulayıb ki, muzeyin ekspozisiyası 6 zaldan ibarətdir. Muzeyin əsas fondunda 18 mindən çox eksponat qorunur. “Fond 8 elmi inventar bölməsinə ayrılıb sənədlər, foto, foto-neqativ, numizmatika, qrafika, rəngkarlıq, heykəltaraşlıq və dekorativ-tətbiqi sənət. Muzeyin fondları bu istiqamətlər üzrə toplanır və mühafizə olunur. Azərbaycan İstiqlal Muzeyinin əsas missiyası Azərbaycan dövlətçiliyinin tarixi yaddaşını qorumaq, müstəqillik ideyasının inkişafını cəmiyyətə çatdırmaq, gələcək nəsillərə milli dövlətçilik dəyərlərini ötürmək, arxivlərin, sənədlərin və maddi-mədəni irsin qorunmasında elmi mərkəz kimi çıxış etməkdir”, - deyə S.Mirseyibli əlavə edib.
Daha sonra media nümayəndələri Milli Azərbaycan Tarixi Muzeyi ilə yaxından tanış olublar.
Diqqətə çatdırılıb ki, muzeyin yerləşdiyi bina böyük xeyriyyəçi Hacı Zeynalabdin Tağıyevin və ailəsinin yaşayış evi olub.
Bu binanın inşası ilə bağlı məlumat verilərkən bildirilib ki, burada 270 nəfər mühəndis, memar, dülgər, nəqqaş və digər ustalar çalışıb. Binanın daxili avadanlıqları Rusiya, Fransa, Amerika və Almaniyadan gətirilib. Sarayda isitmə və soyutma sistemləri quraşdırılıb. Otaqların hər birinin hündürlüyü 13,20 metrə çatırdı. Sütunlar almaz və rəngli güzgülü şüşələrlə bəzədilmiş, döşəmələr Rusiyadan gətirilmiş təbii rəngli ağcaqayın taxtalarla örtülmüşdü. Təkcə binanın tikintisinə 1,2 milyon rubl vəsait xərclənib. Aşağı mərtəbədə H.Z.Tağıyevin kontoru və digər otaqlar, ikinci mərtəbədə yaşayış otaqları, kabinet, Avropa və Şərq zalları, seyf otaqları, mətbəx və hamam yerləşirdi. Y.Məmmədəliyev küçəsinə ayrıca çıxışı olan üçüncü mərtəbə isə 16 otaqdan ibarət idi. 1914-cü ildən etibarən sarayda Hacı Zeynalabdin Tağıyevin rəhbərlik etdiyi Bakı Tacir Bankı da fəaliyyət göstərib”.
Bölmənin digər xəbərləri
