“Azərbaycan mədəniyyəti – 2040” Konsepsiyasının üç mərhələdə həyata keçirilməsi nəzərdə tutulur
Bakı, 14 yanvar, AZƏRTAC
“Azərbaycan mədəniyyəti – 2040” Azərbaycan Respublikasının Mədəniyyət Konsepsiyası qlobal və ölkədaxili çağırışlar nəzərə alınmaqla, Azərbaycanın milli kimliyinə əsaslanan müasir mədəniyyət modelinin yaradılması, inkişafı və 2040-cı ilədək digər mədəniyyətlərlə qarşılıqlı əlaqələrinin genişləndirilməsi üçün dövlət mədəniyyət siyasətinin istiqamətlərini müəyyən edən və mədəniyyət sahəsi ilə bağlı fəaliyyətə vahid, sistemli və dayanıqlı yanaşmanı təmin edən strateji planlaşdırma sənədidir.
AZƏRTAC xəbər verir ki, Konsepsiya çərçivəsində Azərbaycan mədəniyyətinin müasir modelinə mədəniyyətin həyat tərzinin ayrılmaz tərkib hissəsinə çevrilməsi, mədəniyyətin fundamentallığını qorumaqla, fərqli müasir alətlər vasitəsilə bu sahənin funksionallığının təmin edilməsi, sürətli rəqəmsallaşma mühitində ənənəvi ünsiyyətin qorunması və məsələlər digərləri daxildir.
Konsepsiyada Azərbaycan dili, davranış və bilgi mədəniyyəti, ədəbiyyat, incəsənət və mədəni irs sahələri əhatə olunur. Həmçinin Konsepsiyada “Azərbaycanın mədəniyyət dəyərləri”nə milli-mənəvi dəyərlər, tolerantlıq, Azərbaycan dili, fərdilik və özünəməxsusluq, əlçatanlıq və digərləri aiddir.
Konsepsiyanın üç mərhələdə həyata keçirilməsi nəzərdə tutulur. Birinci mərhələ 2026–2030-cu illər, ikinci mərhələ 2031–2035-ci illər, üçüncü mərhələ isə 2036–2040-cı illəri əhatə edəcək.
Bölmənin digər xəbərləri
