Azərbaycan mediası ölkədə həyata keçirilən köklü islahatlardan kənarda qalmır
Bakı, 21 iyul, AZƏRTAC
Bu il Azərbaycanın milli jurnalistikası yaranmasının 148-ci ildönümünü qeyd edir. Müasir, qloballaşan dünyamız Azərbaycanda bir çox sahələrdə olduğu kimi, media sahəsinin də yeniləşməsini, yeni çağırışlara cavab verməsini, habelə cəmiyyətin dəqiq, dürüst, qərəzsiz məlumatlandırılması prosesinin şəffaflıqla həyata keçirilməsini diktə edir.
Bu fikirləri AZƏRTAC-a açıqlamasında Milli Məclisin deputatı Məzahir Əfəndiyev söyləyib.
Onun sözlərinə görə, ölkəmizin dövlətçilik, quruculuq tarixində hər zaman maarifçiliyə böyük önəm verilməsi, cəmiyyətin məlumatlandırılması jurnalistika fəaliyyətinə böyük töhfələr verib. Tarixən söz azadlığı hər bir ölkədə insanların öz fikirlərini sərbəst ifadə etmək arzusunu gerçəkləşdirir. Təsadüfi deyil ki, ictimai fikrə təsir imkanı böyük olan mətbuat bütün dünyada “dördüncü hakimiyyət” adlandırılır. Azad mətbuatın mövcud olduğu ölkələrdə təbii ki, demokratiya və siyasi plüralizm mühiti yaradılır.
“1875-ci il iyulun 22-də Həsən bəy Zərdabinin təsis etdiyi ilk anadilli qəzet olan “Əkinçi”nin nəşrə başlaması xalqımızın milli oyanış və mədəni tərəqqi tarixinin ən önəmli hadisələrindən biridir. O vaxtdan indiyədək Azərbaycanın milli mətbuatı müxtəlif dövrləri əhatə edən zəngin və şərəfli inkişaf yolu keçib. Bu gün yeniləşən dünyamızda Dördüncü Sənaye İnqilabının gətirdiyi müasir çağırışlar Azərbaycanda jurnalistika fəaliyyətinin, mövcud informasiya portallarında, innovativ platformalarda işin təşkilinin daha nizamlı olmasını zəruri edir. Bu baxımdan media institutlarının fəaliyyətinin təkmilləşdirilməsi, eyni zamanda, bugünkü dönəmin müasir çağırışlarını daha düzgün mənimsəyərək jurnalistika fəaliyyətinin ardıcıl inkişaf etdirilməsi əsas hədəflərdəndir. Azərbaycan hökumətinin mətbuat və media siyasəti çərçivəsində həyata keçirdiyi davamlı tədbirlər artıq öz bəhrəsini verməkdədir”, - deyə M.Əfəndiyev qeyd edib.
Uzun illərdən sonra ölkədə “Media haqqında” yeni qanun layihəsinin hazırlandığını və sənədin Milli Məclisdə kifayət qədər geniş müzakirə olunduğunu diqqətə çatdıran deputat bildirib ki, müzakirələr zamanı müxtəlif müstəqil, korporativ maraqları ifadə edən, eləcə də beynəlxalq təcrübədən irəli gələn ekspert fikirləri səsləndirilib. Qanun layihəsi hərtərəfli olaraq nəzərdən keçirildikdən və üç oxunuşdan sonra qəbul edilib.
“Media haqqında” yeni Qanun Azərbaycan mətbuatının tarixinə və jurnalistlərimizin sosial rifahına, məişət problemlərinin həllinə hədəflənərək onların fəaliyyətinin daha səmərəli, nəticəli etmək məqsədi daşıyır. Prezident İlham Əliyevin vurğuladığı kimi, “Biz hamımız çalışırıq və çalışacağıq ki, ölkəmizi daha da gücləndirək, Azərbaycan xalqının daha da yaxşı rifahını təmin edək. Əlbəttə ki, burada həm iqtidarın üzərinə böyük funksiya, həm də mətbuatın üzərinə böyük vəzifələr düşür.
Görülmüş işlər nəticəsində istər mavi ekranlarda, sosial şəbəkə platformalarında, blogerlik fəaliyyətində, istərsə də ənənəvi jurnalistikada tam yeni mənzərə ilə qarşılaşırıq. Bu, öz növbəsində, bir tərəfdən əlavə müxalif fikirlər yaradır, digər tərəfdən isə qarşıya qoyulmuş məqsədlərə çatmaq üçün bu sahədə nizam-intizamın yaradılmasına köməklik göstərir”, - deyə Milli Məclisin deputatı vurğulayıb.
Hərbi jurnalistika sahəsindəki yeniliklərdən danışan deputat bildirib ki, 44 günlük Vətən müharibəsi dövründə Azərbaycan jurnalistləri döyüş bölgəsində baş verən hadisələrin, Azərbaycan həqiqətlərinin həm xalqımıza, həm də dünya ictimaiyyətinə çatdırılması işində öz həyatlarını təhlükəyə ataraq, şiddətli döyüşlərin getdiyi ərazilərdə 24 saat fəaliyyət göstərərək ağır dönəmdə öz peşə vəzifələrini layiqincə yerinə yetirdilər.
Deputat vurğulayıb ki, Birinci və İkinci Qarabağ müharibəsində, eyni zamanda, postmüharibə dövründə qəhrəmancasına şəhid olmuş jurnalistlərimiz var. Onların əziz xatirəsi hər zaman Azərbaycan xalqı tərəfindən ehtiramla anılır.
“Bu gün ölkə mətbuatının sağlam, peşəkar, ölkə maraqları çərçivəsində çıxış etməsi çox vacibdir və bu çətin, şərəfli işi Azərbaycanda çoxsaylı jurnalist ailəsi həyata keçirməkdədir. Mediamız ölkədə həyata keçirilən köklü islahatlardan kənarda qalmır. Ümid edirik ki, cəmiyyətimizin obyektiv və peşəkar şəkildə məlumatlandırılması sahəsində öz səylərini bundan sonra da artıracaq”, - deyə Məzahir Əfəndiyev əminliyini ifadə edib.
Bölmənin digər xəbərləri
