Azərbaycan milisinin baş məşqçisi: Seçmə mərhələdə qrupdan çıxmağa borcluyuq
Bakı, 17 sentyabr, AZƏRTAC
“Əlimizdən gələnin ən yaxşısını etməyə çalışacağıq. Komandama inanıram”.
Bu sözləri AZƏRTAC-a açıqlamasında çimərlik futbolu üzrə Azərbaycan millisinin baş məşqçisi Sahib Məmmədov 2025-ci ildə keçiriləcək dünya çempionatının seçmə mərhələsindəki rəqibləri barədə danışarkən deyib.
O, İspaniya millisinin qrupun aşkar favoriti olduğunu bildirib: “Onlar dəfələrlə Avropa çempionu olublar. Dünya çempionatına da ev sahibliyi edəcəklər. Düzdür, çimərlik böyük futbol kimi olmasa da, İngiltərə millisi də iddialı və ciddi rəqibdir. Gürcüstan seçməsinə gəlincə, qonşu ölkə təmsilçisi ən son B Divizionunda Ukrayna yığması ilə final oynayıb. Bunları ümumiləşdirsək, normal qrupa düşdüyümüzü qeyd edə bilərik”.
39 yaşlı mütəxəssis digər rəqiblərdən heç də zəif olmadıqlarını vurğulayıb: “Dünya reytinqində 22-ci sırada yer almışıq. Bu qrupdan çıxmağa borcluyuq. Bu mərhələni keçsək, daha çətin rəqiblər olacaq. Sonda isə 4 komanda dünya çempionatına vəsiqə qazanacaq. Milli komanda ilə əsas hədəfim mundiala yollanmaqdır. Ötən il yığma B Divizionuna yüksəlməyi bacarıb. Qarşıdakı məqsəd A Liqasına qalxmaqdır”.
Qeyd edək ki, Azərbaycan seçməsi İspaniya, İngiltərə və Gürcüstanla birlikdə A qrupunda yer alıb.
Bölmənin digər xəbərləri
