Azərbaycan millisinin basketbolçusu: Avropa Kubokunda hədəf qrup mərhələsini adlamaq olacaq
Bakı, 10 iyun, AZƏRTAC
“Final oyunları hər zaman gərgin keçir. Kipr komandası sonadək mübarizə apardı”.
Bu sözləri AZƏRTAC-a açıqlamasında Azərbaycanın kişilərdən ibarət 3x3 basketbol millisinin üzvü Amil Həmzəyev Avropa Kubokunun əsas mərhələsinə vəsiqə qazanmaları barədə danışarkən deyib.
O, turnirin ilk oyununda Ermənistan üzərində əldə edilən qələbənin komandaya motivasiya verdiyini bildirib: “Həmin qalibiyyət qarşıdakı oyunlara yaxşı hazırlaşmağımıza imkan yaratdı. İrlandiya ilə yarımfinal görüşünün daha gərgin keçəcəyini gözləyirdik. Çünki onlar bu yarışda final oynamışdılar. Lakin fərqli oldu və rahat qələbə qazandıq”.
Təcrübəli oyunçunun sözlərinə görə, qısamüddətli hazırlıqdan sonra yarışda bu cür nəticə qazanmaq böyük uğurdur: “Ölkə çempionatı bitdikdən sonra dərhal təlim-məşq toplanışına start verdik. Çox yaxşı hazırlıq prosesi keçdik. Bu da turnirdə bizə kömək oldu. İndi hədəf Avstriyada baş tutacaq əsas mərhələnin görüşlərində layiqli mübarizə aparıb qrupdan çıxmaqdır”.
A.Həmzəyev 3x3 basketbol növündəki oyunların yüksək tempdə keçdiyini söyləyib: “Klassik basketboldan fərqli olaraq, burada fikirləşmək imkanın olur. Düzünü desəm, 3x3 daha rahatdır”.
Qeyd edək ki, Avropa Kuboku 22-25 avqustda Vyanada keçiriləcək.
Bölmənin digər xəbərləri
