Azərbaycan nümayəndə heyəti İdman Bütövlüyü üzrə Qlobal Alyansın Forumunda iştirak edir
Bakı, 31 yanvar, AZƏRTAC
Romada İdman Bütövlüyü üzrə Qlobal Alyansının (SIGA) Forumu öz işinə başlayıb.
Gənclər və İdman Nazirliyinin mətbuat xidmətindən AZƏRTAC-a bildiriblər ki, Azərbaycanı bu forumda gənclər və idman nazirinin müavini İsmayıl İsmayılovun rəhbərlik etdiyi nümayəndə heyəti təmsil edir.
Forumun əsas məqsədi SİGA və ölkəmiz arasında idman sahəsində mümkün əməkdaşlığı yaratmaqdır. Bu məqsədlə Alyansın rəhbərliyi Azərbaycanla əlaqələrin qurulması üçün 2018-ci ilin ilk rübündə ölkəmizə rəsmi səfərinin nəzərdə tutulduğunu bildirib.
Tədbirdə Azərbaycan Milli Olimpiya Komitəsinin SIGA-ya üzv olması və əməkdaşlıq əlaqələrinin qurulması üçün müzakirələrin aparılması nəzərdə tutulub. Eləcə də 2020-ci ildə Bakıda keçiriləcək futbol üzrə Avropa çempionatının dörd matçı ilə əlaqədar SIGA tərəfindən paytaxtımızda “İdman, birlik, sülh” şüarı altında tədbirin keçirilməsinə dair irəli sürülmüş təklifin müzakirəsi də planlaşdırılıb.
Forumun açılışında İtaliya Milli Olimpiya Komitəsinin prezidenti Covanni Malaqo, SIGA-nın sədri Franko Frattini və İtaliyanın idman naziri Luca Lotti idmanın inkişafı istiqamətində yeni metodlardan istifadə, dopinqlə mübarizə, atletlərin yarışlara sağlam şəkildə qatılması, idmanda qanun pozuntularına qarşı mühüm addımların atılması və digər əhəmiyyət kəsb edən məqamlar barədə çıxış ediblər.
Tədbirdə gənclər və idman nazirinin müavini İsmayıl İsmayılovun, eləcə də Türkiyə, Serbiya, Fransa, İndoneziya, İtaliya və Avropa Komissiyasının idmana məsul rəsmilərinin iştirakı ilə müxtəlif sahələri əhatə edən panel iclasları keçirilib.
Nazir müavini İsmayıl İsmayılov panel müzakirələr zamanı verilən suallar əsasında mötəbər idman tədbirlərinin ölkə idmanının inkişafına, sağlam və gənc nəslin yetişməsinə, idmanda kütləviliyin artmasına və digər sahələrə müsbət təsirindən danışıb. Bununla yanaşı, İsmayıl İsmayılov Prezident İlham Əliyevin 1997-ci ildən Milli Olimpiya Komitəsinə rəhbərlik etməsindən, idmana göstərdiyi diqqət və qayğıdan söz açıb, ölkəmizdə bu sahədə qazanılan uğurlar barədə məlumat verib.
Forumda İsmayıl İsmayılovla yanaşı, Milli Olimpiya Komitəsinin baş katibinin müavini, Azərbaycan Ağır Atletika Federasiyasının vitse-prezidenti Azər Əliyev, Gənclər və İdman Nazirliyinin beynəlxalq əlaqələr şöbəsinin müdiri Namiq Novruzov da iştirak edirlər.
Bölmənin digər xəbərləri
