Noyabrın 28-dən 30-dək Ukraynanın paytaxtı Kiyev şəhərində universal döyüş üzrə IV Dünya çempionatı keçirilmişdir. 25 ölkənin nümayəndələrinin təmsil olunduğu bu yarışlarda respublikamızdan Azərbaycan Universal Döyüş Federasiyasının 7 idmançısı iştirak etmişdir. Federasiyanın prezidenti, Mərkəzi Ordu İdman Klubunun rəisi Natiq Əliyev açılış mərasimində çıxış edərək son illər ölkəmizdə idmanın inkişafına göstərilən dövlət qayğısı sayəsində Azərbaycanın beynəlxalq aləmdə idman ölkəsi kimi tanındığını bildirmişdir.

Rəsmi hissədən sonra Dünya çempionatı açıq elan edilmişdir. Üç idmançımız öz rəqibləri üzərində inamlı qələbə çalaraq yarımfinala vəsiqə qazanmışdır. İdmançılarımız dünya çempionatının qızıl medallarını Vətənimizə gətirmək üçün mübarizəni əzmlə davam etdirirlər.

Noyabrın 29-da Mərkəzi Ordu İdman Klubunun rəisi Natiq Əliyev Beynəlxalq Universal Döyüş Federasiyası Avropa Təşkilatının sədri seçilmişdir. Bu, idmançılarımızın qələbə inamını daha da artırmışdır.

Dünya Çempionatı noyabrın 30-da final görüşləri ilə başa çatacaqdır.