Azərbaycan Premyer Liqasının uğursuz yay transferləri
Bakı, 21 aprel, AZƏRTAC
Son illərdə Azərbaycan Premyer Liqası həm rəqabət səviyyəsi, həm də transfer aktivliyi baxımından diqqətçəkən çempionatlardan birinə çevrilib.
Klublar daha iddialı hədəflər qoyduqca, heyəti gücləndirmək üçün həm yerli, həm də legioner futbolçu bazarına üz tutur, bəzən isə kifayət qədər böyük maliyyə vəsaiti xərcləyirlər.
Kağız üzərində bu transferlər komandalara əlavə güc qatmalı, nəticələri yaxşılaşdırmalıdır. Lakin futbolun reallığı çox vaxt gözləntilərlə üst-üstə düşmür. Böyük ümidlərlə gətirilən bəzi futbolçular ya komandanın oyun sisteminə uyğunlaşa, ya zədə səbəbindən özlərini göstərə, ya da sadəcə gözlənilən performansı sərgiləyə bilmirlər. Nəticədə hər transfer uğurlu olmur, bəziləri həm idman, həm də maliyyə baxımından klubu geri salır.
Bu yazıda cari mövsümdə Premyer Liqada gözləntiləri doğrultmayan uğursuz transferlərdən bəhs olunacaq.
Siyahının ilk sıralarına “Turan Tovuz”un futbolçularının adlarını yazmaq olar.“Qarabağ”dan ayrıldıqdan sonra ikinci dəfə Azərbaycana qayıdan İbrahima Vadci Tovuz klubuna böyük ümidlərlə gəlsə də, 20 oyunda cəmi 1 qol vurub. Böyük ehtimalla, onunla müqavilənin müddəti uzadılmayacaq. Bölgə təmsilçisinin ikinci uğursuz transferi Kabo-Verde millisinin üzvü David Oliveyra Tavareşdir. Portuqaliya nəhəngi “Benfika”nın yetirməsi olan yarımmüdafiəçi Premyer Liqada cəmi 2 matçda meydana çıxıb. Yayda 3 illik müqavilə imzalanan forvardın da Qərb təmsilçisini tərk edəcəyi gözlənilir.
“Neftçi”nin rumıniyalı müdafiəçisi Kristian Kostini də mövsümün uğursuz transferi adlandırmaq olar. O, “ağ-qaralar”ın heyətində 5 matç keçirib və həmin görüşlərin yalnız birinə start heyətində başlayıb. Yəqin ki, bu oyunçu da mövsüm başa çatdıqdan sonra sola salınacaq.
Siyahıda “Qarabağ”dan iki futbolçu var. Ağdam klubunun qışda Norveçin “Sarpsborq” klubuna satdığı Kris Kuaku və hazırda əvəzedici komanda ilə məşq edən Sami Mmae də ümidləri doğrultmayan legionerlərdəndir. Hər iki futbolçu “Qarabağ”ın heyətində meydana çıxdığı 12 görüşdə ciddi heç nə ilə yadda qalmayıb. Belçikalı müdafiəçi Sami Mmae isə həm də intizamsızlığı ilə diqqət çəkir. Onun mövsümün sonunda müqavilə ilə məxsus olduğu Xorvatiyanın “Dinamo” (Zaqreb) klubuna geri dönəcəyi istisna edilmir.
“Şamaxı”nın yayda 1+1 illik müqavilə bağladığı, bu mövsüm cəmi 10 matçda meydana çıxan Antonio Lara qış fasiləsində Ayxan Abbasovun qərarı ilə yola salınıb.
Uğursuz transferlərin siyahısında “Kəpəz” və “Qəbələ”nin futbolçuları da yer alıblar. Gəncə təmsilçisinin yarımmüdafiəçiləri - Vitor Feijaon ilə Otar Aptsiauri müvafiq olaraq, 9 və 4 oyun keçirərək mövsüm bitmədən komandadan göndəriliblər.
“Qəbələ”dən Kamerun əsilli fransalı yarımmüdafiəçi Jondo Fuxs və anqolalı Paulo Kimbilanı qeyd etmək olar. Fuxs zədə səbəbindən yalnız 3 görüşdə “qırmızı qaralar”ın formasını geyinib. Kimbila isə cəmi 12 görüşdə meydana çıxıb.
Siyahıya “Zirə”dən ayrılan Yeqor Boqomolski və Vinsen Tilli, “Sabah”dan Zinedin Uld Xaledi, eləcə də “Karvan-Yevlax”dan Peter Kinqs və Mois Nqvisani kimi futbolçuları da əlavə etmək olar.
Bölmənin digər xəbərləri
