AZƏRBAYCAN PREZİDENTİ İLHAM ƏLİYEV BAKI METROSUNUN YENİ TİKİLƏN STANSİYALARI İLƏ TANIŞ OLMUŞDUR
Azərbaycan Prezidenti İlham Əliyev avqustun 27-də Bakı metrosunun yeni tikilən “Nəsimi” və “Azadlıq prospekti” stansiyaları ilə tanış olmuşdur.
Dövlətimizin başçısı əvvəlcə tikintisi başa çatmaqda olan “Nəsimi” stansiyasının yerləşdiyi əraziyə gəldi, inşaat işlərinin açıq üsulla aparıldığı sahə və Bakı Metropoliteninin üçüncü növbəsinin şimal sahəsinin sxemi və perspektiv inkişaf sxemləri ilə tanış oldu.
Prezident İlham Əliyevə məlumat verildi ki, “Nəsimi” stansiyasının davamı olaraq çəkilən xətt ilin sonunadək digər stansiya ilə birləşdiriləcəkdir. Metropolitenin yeni stansiyalarının çəkilməsi ilə bağlı layihələr də vardır. Bu layihələr, ilk növbədə, şəhərdaxili şəbəkənin genişləndirilməsini və paytaxt əhalisinin tələbatının tam ödənilməsini nəzərdə tutur. Ölkəmiz müstəqillik qazandıqdan sonra tikilən ilk stansiya olan “Nəsimi” stansiyasının inşası bütünlüklə yerli mütəxəssislərə tapşırılmışdır. Gələcəkdə metronu Sumqayıta qədər uzatmaq nəzərdə tutulur. Perspektivdə Badamdar və Günəşli yaşayış massivlərinə metro xətlərinin çəkilməsi planlaşdırılır.
Son tamamlanma işlərinin aparıldığı “Nəsimi” stansiyası ilə tanışlıq enerji blokundan başladı. Daha sonra Prezident İlham Əliyev stansiyanın platforması ilə tanış oldu.
Bakı Metropolitenində ən müasir avadanlıq ilk dəfə məhz bu stansiyada quraşdırılmışdır. Tikintisinə 2006-cı ildə başlanmış stansiyanın ağır hidrogeoloji şəraitdə inşa olunmasına baxmayaraq, işlər vaxtından tez yerinə yetirilmişdir. Stansiyada, ilk dəfə olaraq, qatarların hərəkətinin tənzimlənməsi və texniki nəzarət kompyuterləşdirilmişdir. Stansiya işə düşdükdən sonra burada 251 nəfər işlə təmin olunacaqdır. “Memar Əcəmi” stansiyasından “Nəsimi” stansiyasına qədər xəttin uzunluğu 2660 metr, yeni stansiyada platformanın uzunluğu isə 102, eni 18 metrdir. Dörd çıxışı olan stansiyada eskalatorlar quraşdırılmışdır.
Paytaxtın 6 və 9-cu mikrorayonlarını birləşdirən stansiyanın ətrafı abadlaşdırılmış, yaxınlıqdakı binalarda təmir-bərpa işləri aparılmışdır.
Ərazidə yaşayan sakinlər də insanların rahatlığı üçün yaradılan şəraitə görə dövlətimizin başçısına təşəkkürlərini bildirdilər.
İLHAM ƏLİYEV: Görürsünüz, Binəqədi rayonu necə gözəlləşir, abadlaşır.
SAKİNLƏR: Cənab Prezident, çox sağ olun. Bəli, hər şey göz qabağındadır. Bunlar hamısı Sizin diqqətiniz sayəsində olmuşdur. Binəqədi camaatı bunu yaxşı başa düşür.
İLHAM ƏLİYEV: Metro insanların rahatlığı üçün əsas nəqliyyat vasitəsidir.
SAKİNLƏR: Bəli, cənab Prezident, metronun işə düşməsi ilə əlaqədar yeni iş yerləri də açılır. Allaha çox şükür, indi hər cür şərait var.
İLHAM ƏLİYEV: Əlbəttə, həm də metro çox gözəl tikilir. İnsanlara rahatlıq yaradacaqdır.
SAKİNLƏR: Cənab Prezident, hər şey çox gözəldir. Yeni avtovağzal da tikilir, körpülər, yollar salınır. Bütün bunlar insanlara göstərilən diqqətdir. Ölkəmiz günbəgün dəyişir. Biz Sizi həmişə dəstəkləyirik.
İLHAM ƏLİYEV: Çox sağ olun. Bütün ölkədə, o cümlədən Bakı şəhərində, Bakının bütün rayonlarında böyük quruculuq işləri gedir.
SAKİNLƏR: Hörmətli Prezident, gənclər Sizi daha çox sevir. Bu da təbiidir. Sizin onlara qarşı diqqətiniz böyükdür. Bu yaxınlarda Olimpiya oyunlarından gənclərimiz alnıaçıq qayıtdılar. Sizi, xalqımızı hamımız ürəkdən təbrik edirik. Azərbaycan bayrağı yüksək zirvələrdə dalğalandı.
İLHAM ƏLİYEV: Sağ olun. Sizə də cansağlığı və uğurlar arzulayıram.
SAKİNLƏR: Biz də Sizə uğurlar arzulayırıq. Sizə minnətdarıq.
Sonra Prezident İlham Əliyev metronun tikintisi davam edən “Azadlıq prospekti” stansiyasına gəldi. Həmin stansiya paytaxtın Binəqədi rayonunun 7 və 8-ci mikrorayonları arasında yerləşir.
Dövlətimizin başçısına burada 2007-ci ilin avqust ayından başlanan tikinti-quraşdırma işləri barədə məlumat verildi. Bildirildi ki, “Nəsimi” stansiyasını “Azadlıq prospekti” stansiyası ilə birləşdirəcək tunelin uzunluğu 1300 metr olacaqdır. İndiyədək burada təxminən 50 min kubmetr torpaq, 4 min 500 kubmetr beton işi görülmüşdür. Tikintidə 150 nəfər çalışır. Artıq platforma və hər iki giriş inşa olunmuş, stansiyanı elektrik enerjisi ilə qidalandıracaq yardımçı stansiya tikilmişdir. Azərbaycanda ilk dəfə məhz bu stansiyada platformanın tavanı tağ şəklində inşa olunmuşdur. Tikinti işlərini “Azərmetrotuneltikinti” Qapalı Səhmdar Cəmiyyəti görür. Ehtiyac olduqda, iş dörd növbədə aparılır.
Prezident İlham Əliyevə “Azadlıq prospekti” stansiyasının davamı kimi nəzərdə tutulan stansiyalar və bununla bağlı görüləcək tədbirlər barədə geniş məlumat verildi.
“Bakımetrolayihə” İnstitutu stansiyanın daxili görünüşünün iki variantda layihəsini hazırlamışdır. Hər iki layihə ilə tanış olan Prezident İlham Əliyev birinci variantı bəyəndi. “Azadlıq prospekti” stansiyasının dərinliyi 12 metr, uzunluğu isə 220 metrdir. Stansiyanın tikintisi 2009-cu ilin sonunda başa çatdırılacaqdır.
Dövlətimizin başçısına “Azadlıq prospekti”-“Dərnəgül deposu” stansiyaları arasındakı ərazinin torpaq planı da nümayiş etdirildi.
Tikinti işlərinin gedişi ilə yaxından tanış olan Prezident İlham Əliyev metronun bu stansiyasında və ətraf ərazilərdə görüləcək işlərlə bağlı müvafiq tövsiyə və tapşırıqlarını verdi.
######
 |
 |
 |
 |
 |
 |
 |
 |
 |
 |
 |
 |
Bölmənin digər xəbərləri
