AZƏRBAYCAN PREZİDENTİ İLHAM ƏLİYEVİN ÇIXIŞI
Hörmətli cənab Prezident!
Hörmətli xanım Besesku!
Əziz dostlar, xanımlar və cənablar!
Bu gün Rumıniya-Azərbaycan münasibətlərinin tarixində çox
əlamətdar bir gündür. Azərbaycan xalqının ümummilli lideri Heydər Əliyevin adını daşıyan xiyabanın açılışına toplaşmışıq. Bu münasibətlə mən sizin hamızını ürəkdən təbrik edirəm.
Müasir Azərbaycan dövlətinin qurucusu Heydər Əliyev öz həyatını doğma xalqına xidmətə həsr etmişdir. Əsrlər boyu müstəqillik həsrətində olmuş Azərbaycan xalqı müstəqillik qazandıqdan sonra çox böyük çətinliklərlə üzləşmişdi. Heydər Əliyevin rəhbərliyi altında Azərbaycan öz dövlət müstəqilliyini möhkəmləndirdi, onu əbədi, dönməz etdi və bu gün Azərbaycan çox sürətlə inkişaf edən ölkədir.
Rumıniya-Azərbaycan münasibətlərinin inkişafında da Heydər Əliyevin çox böyük rolu olmuşdur. O, Rumıniyaya və rumın xalqına həmişə böyük hörmət və məhəbbətlə yanaşırdı. Hazırda bizim əlaqələrimiz daha da sürətlə inkişaf edir və Rumıniya-Azərbaycan tərəfdaşlığı həm iki ölkənin inkişafına, həm də bölgədə gedən müsbət proseslərə öz təsirini göstərməkdədir.
Mən bu gün hörmətli Prezident Beseskunun dəvətini qəbul edib yenidən Rumıniya torpağında səfərdəyəm. Bu imkan bizə yeni üfüqlər açacaqdır. Biz bu gün cənab Prezidentlə ikitərəfli münasibətləri təhlil etdik, gələcək inkişaf perspektivlərini müzakirə etdik və bir daha əmin olduq ki, xalqlarımız bir-birinə çox yaxındır, ölkələrimiz çox sıx əməkdaşlıq edir və hər birimiz bu əməkdaşlığın inkişafı üçün bundan sonra da öz səylərimizi göstərəcəyik.
Rumıniya Azərbaycanın müstəqilliyini tanıyan ikinci ölkə olmuşdur. Müstəqillik dövründə biz həmişə Rumıniyanın dəstəyini hiss etmişik, bu gün də bunu hiss edirik. Azərbaycanın Avratlantik strukturlarına inteqrasiya meyillərini Rumıniya dövləti və şəxsən Prezident Besesku həmişə dəstəkləmişdir və bu dəstəyi biz bu gün də hiss edirik. Regional əməkdaşlıq işlərində Rumıniya çox fəal rol oynayır və bu, bizi daha da birləşdirir.
Ermənistan-Azərbaycan, Dağlıq Qarabağ münaqişəsinin həlli işində və postsovet məkanındakı başqa oxşar münaqişələrin həlli məsələlərində Rumıniyanın birmənalı mövqeyi var. O da ondan ibarətdir ki, beynəlxalq hüquq normalarına əməl edilməli ölkələrin ərazi bütövlüyü bərpa olunmalıdır.
Amma bizi təkcə siyasi maraqlar, yaxud da ki, iqtisadi əməkdaşlıq layihələri birləşdirmir. Bizi eyni zamanda, humanitar məsələlər birləşdirir. Xalqlarımızın görkəmli şəxsiyyətlərinə hörmətimiz, ehtiramımız birləşdirir. Çox əlamətdar hadisədir ki, Rumıniya torpağında Böyük azərbaycanlı Heydər Əliyevin, Azərbaycan torpağında isə Böyük rumın Corce Eneskunun abidələri ucaldılmışdır.
Mən Rumıniya-Azərbaycan münasibətlərinin perspektivlərinə çox böyük nikbinliklə baxıram. Biz son iki il ərzində Prezident Besesku ilə beş dəfə görüşmüşük və bu görüşlər çox səmimi şəkildə keçir. Növbəti planlarımız da var və mən şübhə etmirəm ki, bizim dövlətlərimiz qarşıda duran bütün vəzifələri çiyin-çiyinə yerinə yetirəcək və əməkdaşlıq daha da möhkəmlənəcəkdir.
Mən bu parka üçüncü dəfədir gəlirəm və hər dəfə burada yeniliklər görürəm. Park daha da gözəlləşir, daha da abadlaşır və bu, çox sevindirici haldır. Burada şəhərin, bu sektorun sakinləri üçün də çox gözəl şərait yaradılıbdır. Bu parkın bərpasında və Heydər Əliyev xiyabanının yaradılmasında əməyi olan bütün insanlara öz dərin minnətdarlığımı bildirmək istəyirəm. Xüsusilə Prezident Beseskuya və Buxarest şəhərinin ikinci sektorunun merinə və bütün dost rumın xalqına bu münasibətə, bu hörmətə, ulu öndərin xatirəsinə verilən bu qiymətə görə öz dərin minnətdarlığımı bildirmək istəyirəm.
Təşəkkür edirəm.
X X X
 |
 |
 |
 |
 |
Sonra prezidentlər Trayan Besesku və İlham Əliyev, dövlət başçılarının xanımları Mariya Besesku və Mehriban Əliyeva xalqımızın ümummilli lideri Heydər Əliyevin büstü önünə gül dəstələri qoydular.
Dövlət başçıları parkı gəzdilər, Tei gölünün əsrarəngiz panoramına tamaşa etdilər.
Gəzinti zamanı Buxarest Texniki Universitetinin Heydər Əliyev təqaüdçüləri olan azərbaycanlı tələbələr Prezident İlham Əliyevə yaxınlaşaraq, ona minnətdarlıqlarını bildirdilər. Buxarestin türk və tatar diasporlarının nümayəndələri Azərbaycan Prezidentinə üzərində aşağıdakı sözlər yazılmış plaket təqdim etdilər: “Azərbaycan türklərinin, bütün türk dünyasının lideri mərhum Heydər Əliyevin xatirəsinə ehtiram əlaməti olaraq bu abidənin ucaldılmasına və bu parkın açılışına görə Sizə təşəkkürümüzü bildiririk”.
Xiyabanda Azərbaycan və rumın artistləri konsert proqramı ilə çıxış etdilər.
Daha sonra Heydər Əliyev xiyabanının açılışı münasibətilə atəşfəşanlıq oldu.
Bütövlükdə bu mərasim Azərbaycan və rumın xalqları arasında ənənəvi dostluq münasibətlərinin yeni inkişaf mərhələsinə qədəm qoymasının bariz nümunələrindən biri idi. Milli mənafelərə xidmət edən dövlət siyasəti ölkələr arasında əlaqələri möhkəmləndirməklə yanaşı, xalqları bir-birinə daha da yaxınlaşdırır.
Bölmənin digər xəbərləri
