-Hörmətli cənab Prezident!

-Hörmətli xanımlar və cənablar!

Bu gün mənim Macarıstana dövlət səfərimin ikinci günüdür və biz onu biznes forumunun açılması ilə başlayırıq. Bu, çox əlamətdar bir hadisədir. Bu onu göstərir ki, bizim əməkdaşlığımızın gözəl perspektivləri var.

Dünən keçirilən danışıqlarda və imzalanmış sənədlərdə əməkdaşlığımızın əsas istiqamətləri müəyyən edilmiş və bir daha iki ölkənin siyasi baxımdan yaxın olmasını əks etdirən qərarlar qəbul edilmişdir. Birgə bəyannamədə bizim ikitərəfli münasibətlərimizin əsas parametrləri öz əksini tapmışdır. İndi isə biz elə etməliyik ki, imzalanmış sənədləri həyata keçirək və əldə edilmiş razılaşmaları o cümlədən iqtisadi inkişafa yönəldək. Bunun üçün çox gözəl imkanlar var. Macarıstanla Azərbaycan arasında siyasi əlaqələr çox yüksək səviyyədədir. Mənim Macarıstana dövlət səfərimin əsas nəticələri bundan ibarətdir ki, bu siyasi əlaqələr daha da güclənəcək və yeni müstəviyə çıxacaqdır.

Bizim aramızda energetika sahəsində başlanan əməkdaşlıq çox ümidvericidir. Əminəm ki, biz buna nail olacağıq və müzakirə edilən bütün məsələlərdə bizim aramızda fikir ayrılığı yoxdur. Azərbaycan neft-qaz ölkəsidir və artıq dünya bazarlarına və o cümlədən Avropa bazarlarına böyük həcmdə neft və qaz çıxarır. Gələcəkdə hasilatımız daha da artacaq və bizə imkan verəcək ki, həm öz milli maraqlarımızı maksimum dərəcədə həll edək, eyni zamanda, dostlarımız, tərəfdaşlarımız üçün etibarlı tərəfdaşa çevrilək. Bizim apardığımız siyasət çox aydındır, açıqdır və bu siyasət əməkdaşlığa yönəldilibdir. Biz çalışırıq və bundan sonra çalışacağıq ki, Azərbaycanın neft-qaz ehtiyatları bu günə qədər olduğu kimi, gələcəkdə də bölgədə sülhün möhkəmlənməsinə, əməkdaşlığın dərinləşməsinə xidmət etsin.

Macarıstanla energetika sahəsində əməkdaşlıq çox uğurludur. Əminəm ki, yaxın zamanlarda bu əməkdaşlığın yeni, çox mühüm əlamətləri üzə çıxacaqdır. Beləliklə, əməkdaşlığımız həm bizim bölgə üçün, həm də Avropa İttifaqı üçün çox əhəmiyyətli olacaqdır. Eyni zamanda, biz qeyri-neft sektorunun inkişafına da çox böyük önəm veririk və çalışırıq ki, Azərbaycan iqtisadiyyatını çoxşaxəli formada inkişaf etdirək. Bunu etmək üçün bizim öz imkanlarımız da var. İldən-ilə artan maliyyə ehtiyatlarımız imkan verir ki, Azərbaycanda genişmiqyaslı dövlət investisiya layihələrini həyata keçirək.

Biz növbəti illərdə yüz milyardlarla dollar həcmində gəlir əldə edəcəyik. Dünya Bankının hesablamalarına görə, növbəti 15 il ərzində bu məbləğ 200 milyard dollar olacaqdır, bəlkə də ondan da çox. Əlbəttə ki, bizim maliyyə çətinliklərimiz yoxdur. Amma bununla bərabər, biz istəyirik ki, ölkəmizin inkişafı üçün lazım olan iqtisadiyyat və infrastruktur layihələrinə xarici tərəfdaşlarımızı da cəlb edək. Biz Macarıstanı özümüz üçün çox yaxın dost, tərəfdaş bir ölkə kimi tanıyırıq. Macarıstan Azərbaycanın dövlət müstəqilliyini tanıyan ilk dövlətlərdən biridir və o vaxtdan bu günə qədər bütün sahələrdə əməkdaşlıq çox uğurlu olmuşdur.

Biz bütün imkanlarımızı sizin üçün təqdim edirik. Hesab edirəm ki, bugünkü biznes forumunun əsas məqsədi iş adamları arasında əməkdaşlığı dərinləşdirmək, qarşılıqlı imkanları ortaya qoymaq, təqdimat keçirmək və göstərməkdir ki, hansı sahədə hansı imkanlar var, hansı ölkə və onun şirkətləri hansı sahədə iştirak edə bilər. Biz investisiyalar üçün, o cümlədən xarici investisiyalar üçün çox cəlbedici ölkəyik. Bu günə qədər ölkəmizə on milyardlarla dollar həcmində investisiyalar qoyulub və adambaşına düşən xarici sərmayənin həcminə görə Azərbaycan bölgədə birinci sıralardadır.

Azərbaycanda bütün investisiyalar, o cümlədən xarici investisiyalar çox etibarlı şəkildə qorunur. Bizim üçün strateji olan layihələr, hətta qanun kimi qəbul edilir və beləliklə, həm investorlarda, həm də yerli qurumlarda tam əminlik var ki, bu sazişlərə, layihələrə, razılaşmalara heç kim müdaxilə etməyəcəkdir. Biz xarici investisiyaları maksimum dərəcədə qorumaq üçün əlimizdən gələni edirik və bu günə qədər bu sahədə heç bir narazılıq, yaxud da mübahisəli məqam olmamışdır. Biz bu etibarı qazanmışıq və onu çox yüksək qiymətləndiririk. Əminəm ki, Macarıstan şirkətləri üçün Azərbaycanda iş görmək çox yaxşı nəticə verə bilər.

Azərbaycan bu yaxınlarda Dövlət İnvestisiya Şirkətini yaratmışdır və əminəm ki, o şirkətin imkanları barəsində bu gün burada danışılacaqdır. Şirkətin əsas məqsədi ondan ibarətdir ki, dövlət xarici investisiyaları cəlb etmək üçün özü müəyyən layihələrdə səhmdar kimi iştirak edə bilər, edir və edəcəkdir. Beləliklə, xarici investorlarda daha da böyük inam yaranır. Əminəm ki, Azərbaycan Dövlət İnvestisiya Şirkətinin çox gözəl və uğurlu gələcəyi olacaqdır. Ümid edirəm ki, Macarıstan şirkətləri də Dövlət İnvestisiya Şirkəti ilə bərabər Azərbaycanda müxtəlif layihələri icra edəcəkdir.

Eyni zamanda, dövlət xətti ilə investisiyaların həcmi ildən-ilə artır. Bu il 3,5 milyard dollar həcmində təkcə dövlət xətti ilə və ilk növbədə, infrastruktur layihələrinə və ölkənin inkişafı üçün zəruri olan bütün istiqamətlərə investisiyalar qoyulacaqdır. Mən fürsətdən istifadə edərək, Macarıstan şirkətlərini Azərbaycanda dövlət xətti ilə həyata keçiriləcək investisiya layihələrində iştirak etməyə dəvət edirəm.

Onu da demək istəyirəm ki, artıq Azərbaycan şirkətləri də xaricə investisiyalar qoyur. Bu investisiyalar artıq milyard dollarla ölçülür. Əlbəttə ki, bizim üçün maraq doğuran sahələr müxtəlifdir. İlk növbədə, bizə dost, yaxın olan ölkələrə sərmayə qoymağı nəzərdə tutmuşuq və öz şirkətlərimizi bu istiqamətə yönəldirik. Əminəm ki, biznes forumu qarşılıqlı investisiyaların qoyuluşu işinə güclü təkan verəcəkdir.

Bu fürsətdən istifadə edib, mənə və nümayəndə heyətinə göstərdiyi qonaqpərvərliyə görə cənab Prezidentə bir daha öz minnətdarlığımı bildirmək istəyirəm. Əminəm ki, bu səfər və onun nəticələri iki ölkə arasında olan dostluq əlaqələrini əhəmiyyətli dərəcədə möhkəmləndirəcəkdir.

Təşəkkür edirəm.

X X X

SÜLT TİBOR: Cənab prezidentlər, söylədiyiniz xoş sözlərə görə çox sağ olun. Sizə fəaliyyətinizdə böyük uğurlar arzulayırıq və çox minnətdarıq ki, gəlib biznes forumunda iştirak etdiniz.

X X X

Biznes forumun rəsmi açılışı başa çatdıqdan sonra Macarıstan Prezidenti Laslo Şoyom Azərbaycan Prezidenti İlham Əliyev ilə səmimiyyətlə sağollaşdı.

X X X

Sonra forum öz işini davam etdirdi. Azərbaycanın iqtisadi inkişaf naziri Heydər Babayev iki ölkə arasında olan iqtisadi əlaqələrdən, AZPROMO-nun prezidenti Emil Məcidov isə Azərbaycanda Macarıstan sərmayələri üçün perspektivlərdən danışdılar. Anar Axundov rəhbərlik etdiyi Azərbaycan İnvestisiya Şirkətinin təqdimatını etdi.

Forum çərçivəsində iş adamları arasında bir sıra ikitərəfli görüşlər keçirildi, Azərbaycanın “NJT 2000” və Macarıstanın “Borsod Chem” şirkətləri arasında 14 milyon dollarlıq xammal alınması barədə Memorandum imzalandı.

######