AZƏRBAYCAN PREZİDENTİ İLHAM ƏLİYEVİN RUSİYAYA İLK RƏSMİ SƏFƏRİ YÜKSƏK QİYMƏTLƏNDİRİLİR
Bir çox məqalələrdə əsas fikir isə budur ki, Rusiya və Azərbaycan strateji tərəfdaşlardır. Məsələn, “Krasnaya zvezda” yazır ki, “bu gün Rusiya və Azərbaycan rəhbərliyinin mövqeləri tamamilə üst-üstə düşür ki, Rusiya Azərbaycanın strateji tərəfdaşıdır. Bizim ölkəmizlə strateji tərəfdaşlığa yönəldilmiş xətt Prezident Heydər Əliyev tərəfindən müəyyən olunmuşdur. Bunu belə bir fakt da təsdiq edə bilər ki, hazırda Azərbaycan-Rusiya münasibətlərinin hüquqi bazasını yüzədək dövlətlərarası və hökumətlərarası saziş, o cümlədən dostluq və əməkdaşlıq haqqında saziş təşkil edir. “Vremya novostey” qəzeti də vurğulayır ki, “Azərbaycan Rusiyanın Cənubi Qafqazda və ümumən postsovet məkanında strateji tərəfdaşıdır və respublikanın yeni Prezidenti ötən illərdə atasının, Putinin təbirincə desək, “siyasi nəhəng” Heydər Əliyevin həyata keçirdiyi xəttin varisi olduğunu açıq-aşkar təsdiqləməyə çalışır.
Ekspertlərin fikrincə, dövlətlərarası münasibətlərin strateji tərəfdaşlıq səviyyəsinə yüksəlməsinin etiraf edilməsi son illər ikitərəfli əlaqələrin inkişafında və möhkəmləndirilməsində əsas amildir və buna, Azərbaycan Prezidenti Heydər Əliyevin və Rusiya Prezidenti Vladimir Putinin siyasi iradəsi sayəsində nail olunmuşdur. Ekspertlər onu da məmnunluqla qeyd edirlər ki, yeni Prezident həmin siyasi xətti davam etdirir və bu da münasibətləri sabit və anlaşıqlı etməyə imkan yaradır.
Qəzetlərin icmalından belə nəticəyə gəlmək olar ki, Rusiya Azərbaycanla əməkdaşlığın vacibliyini başa düşür və o, çox konstruktiv dialoqa köklənmişdir. “Vremya novostey” qəzetində Dmitri Orlovun “Azərbaycanın yeni tərəfdaşlığa sifarişi” sərlövhəli məqaləsində deyilir ki, “postsovet məkanı əsaslı surətdə dəyişir və Rusiya bu dəyişikliklərə reaksiya vermək üçün tələsməlidir. İlham Əliyev yeni formasiyanın lideridir. Bəli, Azərbaycanın sıx tərəfdaşlıq münasibətlərinin saxlanmasına yönəldilmiş xətti dəyişmir, hətta güclənir. Lakin varisliyi saxlayan İlham Əliyev sabiq SSRİ ərazisindəki siyasi rejimlərin tədricən dəyişməsini təcəssüm etdirir. Azərbaycanı modernləşdirmək onun məqsədlərindən biridir. Azərbaycanın və Gürcüstanın timsalında görürük ki, hakimiyyətə yeni epoxanın liderləri gəlirlər. Onlar idarəetməyə tamamilə başqa üslubda yanaşan liderlərdir. Lakin indidən görünür ki, İlham Əliyev Gürcüstanın yeni seçilmiş prezidentindən fərqlənir. O, gürcüstanlı həmkarından fərqli olaraq, elitanın, Rusiya ilə münasibətlərin saxlanılması və möhkəmləndirilməsinə tərəfdar olan hissəsini təmsil edir. Azərbaycan Prezidenti, hər halda, MDBMİ-nin məzunudur, özü də bu ali məktəbin belə ali vəzifə tutan ilk məzunudur”.
Rusiyanın kütləvi informasiya vasitələri Ermənistan-Azərbaycan münaqişəsinə də böyük diqqət yetirirlər. Qəzetlər yazırlar ki, Rusiya dövlətinin başçısı uzun sürən bu problemin həlli yollarının axtarışında səyləri fəallaşdırmağı vəd etmişdir. “İzvestiya” yazır: “Moskva Qarabağ münaqişəsinin nizama salınmasına hər cür yardım göstərmək niyyətini təsdiqləmişdir. Putinin sözlərinə görə, bu problem təbii olaraq, həm Azərbaycanla, həm də Ermənistanla ikitərəfli əlaqələri məhdudlaşdırır. İlham Əliyev də Rusiyanın daha çox səy göstərəcəyinə ümidvar olduğunu bildirmişdir”.
Beynəlxalq terrorizmlə mübarizə sahəsində beynəlxalq birliyin səylərinin əlaqələndirilməsi və bu məsələdə Rusiya ilə daha sıx əməkdaşlığa hazırlıq barədə Azərbaycanın Prezident İlham Əliyev tərəfindən bəyan edilən mövqeyi də aparıcı qəzetlərin analitik məqalələrində öz əksini tapmışdır. Səfər zamanı imzalanmış və siyasi, iqtisadi, humanitar sahələrdə sıx əməkdaşlıq üçün daha geniş imkanlar açan ikitərəfli sazişlər də yüksək qiymətləndirilir.
Ümumiyyətlə, demək lazımdır ki, Rusiya KİV-ləri Azərbaycan Respublikasının Prezidenti İlham Əliyevin bu ölkəyə ilk səfərini işıqlandırarkən, görünməmiş xeyirxahlıq və obyektiv mövqe nümayiş etdirmiş, bununla da sanki Rusiya rəhbərliyinin Azərbaycan dövlətinin yeni başçısına səmimi mövqeyini göstərməyə çalışmışlar.
Bölmənin digər xəbərləri
