AZƏRBAYCAN PREZİDENTİ İLHAM ƏLİYEVİN VƏ MACARISTAN PREZİDENTİ LASLO ŞOYOMUN GENİŞ TƏRKİBDƏ GÖRÜŞÜ
AZƏRTAC-ın xüsusi müxbiri xəbər verir ki, fevralın 18-də Budapeştdə, Şandor sarayında Azərbaycan Respublikasının Prezidenti İlham Əliyevin və Macarıstan Prezidenti Laslo Şoyomun geniş tərkibdə görüşü olmuşdur.
Macarıstan Prezidenti Laslo Şoyom görüşü açaraq dedi ki, biz Qafqazda Azərbaycana strateji tərəfdaş kimi baxırıq, ölkələrimiz arasındakı əlaqələr dinamik şəkildə inkişaf edir. İkitərəfli münasibətlərimiz Avropa Birliyi çərçivəsində də əməkdaşlığımızın genişlənməsinə xidmət edir. Macarıstan Prezidenti vurğuladı ki, iqtisadi əlaqələrin inkişafı üçün yaxşı imkanlar var, biz xüsusilə energetika sahəsində Azərbaycanla əməkdaşlığa böyük diqqət yetiririk. Eyni zamanda, təhsil və elm sahəsində də əlaqələrin inkişaf etdirilməsində maraqlıyıq.
Prezident İlham Əliyev Azərbaycan ilə Macarıstan arasında əlaqələrin müxtəlif sahələr üzrə genişləndiyini bildirərək dedi ki, biz indi yeni səviyyəyə qədəm qoyuruq. Bu gün imzalanacaq sənədlər bu əlaqələrin hüquqi bazasını yaradacaqdır. Avratlantik strukturlara inteqrasiya istiqamətində Macarıstanla əməkdaşlığımız, eyni zamanda, Azərbaycanın Avropaya inteqrasiyasının daha da genişlənməsinə xidmət edəcəkdir. İqtisadi əlaqələrin yaxşı perspektivlərinin olduğunu deyən Prezident İlham Əliyev fevralın 19-da keçiriləcək Azərbaycan-Macarıstan biznes forumunun əhəmiyyətli olacağını vurğuladı, energetika sahəsində müzakirələrin yaxşı getdiyini söylədi.
Dövlətimizin başçısı Ermənistan-Azərbaycan, Dağlıq Qarabağ münaqişəsinə də toxundu, torpaqlarımızın 20 faizinin işğal edildiyini, ölkəmizdə 1 milyondan çox qaçqın və məcburi köçkünün olduğunu xatırlatdı.
Macarıstan Prezidenti ölkəmizin ərazi bütövlüyünü dəstəklədiyini və münaqişənin məhz bu çərçivədə sülh yolu ilə həllinə tərəfdar olduğunu bildirdi.
Sonra sənədlərin imzalanma mərasimi oldu.
######
 |
 |
Bölmənin digər xəbərləri
